തിരുവനന്തപുരം: കോഴിക്കോട് താമരശ്ശേരിയില്‍നിന്നു ശേഖരിച്ച ടീറോപസ് വിഭാഗത്തില്‍പ്പെട്ട ഒരു വവ്വാലിലും കൊടിയത്തൂര്‍ മേഖലയില്‍നിന്നു ശേഖരിച്ച റോസിറ്റസ് വിഭാഗത്തില്‍പ്പെട്ട ചില വവ്വാലുകളിലും നിപാ വൈറസിന് എതിരായ ഐ.ജി.ജി ആന്റിബോഡി സാന്നിധ്യം സ്ഥിരീകരിച്ചു.
നിപ വൈറസ് സ്ഥിരീകരിച്ച ചാത്തമംഗലം പഞ്ചായത്തിനു സമീപപ്രദേശങ്ങളായ കൊടിയത്തൂര്‍, താമരശ്ശേരി എന്നിവിടങ്ങളില്‍നിന്ന് ഐ.സി.എം.ആറിന്റെ നിര്‍ദേശാനുസരണമാണ് പൂനെ എന്‍.ഐ.വി സംഘം വവ്വാലുകളെ ശേഖരിച്ചതും പരിശോധന നടത്തിയതും.
50 പരിശോധനാ ഫലങ്ങള്‍ ഇനിയും വരാനുണ്ട്. പഠനങ്ങള്‍ നടത്തിയശേഷമേ കൂടുതല്‍ സ്ഥിരീകരണങ്ങളിലേക്ക് എത്താന്‍ കഴിയുകയുള്ളൂ.
നിപായുടെ പ്രഭവ കേന്ദ്രം ഈ വവ്വാലുകളാണെന്ന് കരുതേണ്ടി വരുമെന്ന് ആരോഗ്യമന്ത്രി വീണാ ജോര്‍ജ് വ്യക്തമാക്കി. വൈറസിന്റെ ഇന്‍ക്യുബേഷന്‍ കാലയളവായ 21 ദിവസം കഴിഞ്ഞു. ഈ കാലയളവില്‍ പുതിയ കേസ് റിപ്പോര്‍ട്ട് ചെയ്തിട്ടില്ല.

ചിട്ടയായ പ്രവര്‍ത്തനമാണ് രോഗത്തെ പിടിച്ചു നിര്‍ത്തുന്നതിനും പുതിയ കേസുകള്‍ ഉണ്ടാകാനുള്ള സാഹചര്യം ഒഴിവാക്കാനും സഹായകമായത്.
ഇന്‍കുബേഷന്‍ കാലയളവിന്റെ ഇരട്ടി ദിവസം (42 ദിവസം) പുതിയ കേസുകള്‍ റിപ്പോര്‍ട്ട് ചെയ്യപ്പെടാതിരുന്നാല്‍ രോഗം നിയന്ത്രണത്തില്‍ വന്നതായി പ്രഖ്യാപിക്കുമെന്നും മന്ത്രി പറഞ്ഞു.സെപ്റ്റംബര്‍ 4ന് നിപാ റിപ്പോര്‍ട്ട് ചെയ്തപ്പോള്‍ മുതല്‍ വലിയ പ്രവര്‍ത്തനങ്ങളാണ് നടത്തിയത്.
ഹൗസ് ടു ഹൗസ് സര്‍വേയുടെ ഭാഗമായി പഞ്ചായത്തുകളുടെ സഹായത്തോടെ 16,732 വീടുകളും 76,074 ആളുകളെയും സന്ദര്‍ശിച്ചു. 50 പേരുടെ സാമ്പിള്‍ പരിശോധനയ്ക്കയച്ചു.
ഇവയുടെയെല്ലാം പരിശോധനാ ഫലം നെഗറ്റീവ് ആയെന്നും മന്ത്രി കൂട്ടിച്ചേര്‍ത്തു.

സെപ്റ്റംബര്‍ 5ന് ആണ് നിപാ സ്ഥിരീകരിച്ച 12 വയസുകാരന്‍ കോഴിക്കോട് സ്വകാര്യ ആശുപത്രിയില്‍ മരിച്ചത്. നിപാ സ്ഥിരീകരിച്ചതോടെ കോഴിക്കോട് ചാത്തമംഗലം പഞ്ചായത്തിലെ പാഴൂര്‍ (വാര്‍ഡ് 9) അടച്ചിരുന്നു. കേന്ദ്ര സംഘവും മൃഗസംരക്ഷണ വകുപ്പ് അധികൃതരും സ്ഥലത്തെത്തി വിശദ പരിശോധന നടത്തി.
ആദ്യഘട്ടത്തില്‍ ശേഖരിച്ച മൃഗസാംപിളുകള്‍ ഭോപ്പാലില്‍ പരിശോധിച്ചപ്പോള്‍ ഫലം നെഗറ്റീവ് ആയിരുന്നു. തുടര്‍ന്നാണ് രോഗത്തിന്റെ ഉറവിടം കണ്ടെത്താന്‍ വിശദമായ പരിശോധന നടത്തിയത്. മരിച്ച കുട്ടിയുടേത് ഇത്തവണത്തെ ആദ്യ കേസ് തന്നെയാണെന്നാണ് നിഗമനം. ഇതു മൂന്നാം തവണയാണ് കേരളത്തില്‍ നിപാ സ്ഥിരീകരിച്ചത്.