ദീപു ശാന്താറാം

 

കോതമംഗലം: തന്നെ കടിച്ച് കൊല്ലാനെത്തിയ തെരുവ് നായയെ ധൈര്യപൂര്‍വം  കീഴ്‌പ്പെടുത്തി വയോധികയായ പാത്തുമ്മ. പ്രദേശത്തെ  നിരവധി പേരെ കടിച്ചു പരിക്കേല്‍പ്പിച്ച നായയെ ഏറെ 

നേരത്തെ  ബലപ്രയോഗത്തിലൂടെ ചെറുത്ത് തോല്‍പ്പിച്ചാണ് നെല്ലിക്കുഴി കുറ്റിലഞ്ഞി പുത്തന്‍പുരക്കല്‍ പാത്തുമ്മ (61)രക്ഷപ്പെട്ടത്. ബഹളം കേട്ട് അയല്‍വാസി എത്തുന്നതു വരെ കടിയേറ്റ് ചോര ചീറ്റുന്ന കൈകള്‍ കൊണ്ട് നായയുടെ വായ അമര്‍ത്തി അടച്ചു പിടിച്ചിരിക്കുകയായിരുന്നു  ഇവര്‍ .രണ്ട് കാലിലും കൈകളിലും നായ കടിച്ചു പറിച്ചു, നായ തന്നെ കൊല്ലുമെന്ന് ഉറപ്പായതോടെ ധൈര്യം സംഭരിച്ച് ബലപരീക്ഷണത്തിനൊരുങ്ങുകയായിരുന്നു ഇവര്‍. നിരവധി പേര്‍ക്ക് സമാന രീതിയില്‍ ഈ നായയുടെ കടിയേറ്റ് പരിക്കുപറ്റി ചികിത്സയിലുണ്ട്.

കുറ്റിലഞ്ഞി സ്വദേശിനിയായ  ആരോഗ്യ പ്രവര്‍ത്തക സന്ധ്യ ബാബുവിനും ഈനായയുടെ കടിയേറ്റ് ഇരുകാലുകള്‍ക്കും സാരമായ പരിക്കേറ്റിരുന്നു. വഴിയാത്രക്കാരനായ ജീപ്പ് ഡ്രൈവറാണ് സന്ധ്യയെ രക്ഷപ്പെടുത്തിയത്. കുറ്റിലഞ്ഞി സ്വദേശിനി സരോജനിയുടെ വലത് കൈവിരലാണ് നായ കടിച്ചെടുത്തത്.മൂന്നാറിലേക്ക് വിനോദയാത്രക്ക് പോയ തൃശൂര്‍ സ്വദേശിയായ യുവാവിന്റെ കാല്‍ വിരല്‍  നായ കടിച്ചെടുത്തിരുന്നു.ചൊവ്വാഴ്ച രാവിലെ നായയുടെ ആക്രമണത്തില്‍ ഗുരുതരമായി മുഖത്ത് പരിക്കേറ്റ മദ്‌റസ വിദ്യാര്‍ഥി കോട്ടയം മെഡിക്കല്‍ കോളേജ് ആശുപത്രിയില്‍ ചികിത്സയിലാണ്.