തിരുവനന്തപുരം
ബില്ലുകളിൽ നിർദേശിക്കുന്ന ഭേദഗതികളിൽ ഒന്നു പോലും പരിഗണിക്കുന്നില്ലെന്ന പ്രതിപക്ഷത്തിന്റെ പരാതിക്ക് ഇന്നലെ ആരോഗ്യമന്ത്രി വീണ ജോർജിൻറെ വക പരിഹാരം. നിർദേശിച്ച ഭേദഗതികൾ കൂട്ടത്തോടെ സ്വീകരിച്ച മന്ത്രിയെ സ്പീക്കറും പ്രതിപക്ഷാംഗങ്ങളും അഭിനന്ദിക്കുകയും ചെയ്തു.
ഇന്നലെ ആരോഗ്യമന്ത്രി അവതരിപ്പിച്ച രണ്ടു ബില്ലുകളിലായി 1,630 ഭേദഗതികളാണ് അംഗങ്ങൾ നിർദേശിച്ചത്. അതിൽ പ്രതിപക്ഷം നിർദേശിച്ച കൂടുതൽ ഭേദഗതികളും മന്ത്രി അംഗീകരിക്കുകയായിരുന്നു. മന്ത്രി നല്ല മാതൃകയാണ് കാണിച്ചതെന്ന് പ്രതിപക്ഷത്തുനിന്ന് പി.കെ ബഷീർ പറഞ്ഞു. പിന്നാലെ സ്പീക്കറും അഭിനന്ദനം അറിയിക്കുയായിരുന്നു.