തിരുവനന്തപുരം: മുല്ലപ്പെരിയാര്‍ മരംമുറിയുമായി ബന്ധപ്പെട്ട് നവംബര്‍ 1 ന് യോഗം നടന്നതായി അറിയില്ലെന്ന് ജലവിഭവമന്ത്രി റോഷി അഗസ്റ്റിന്‍. സെപ്റ്റംബര്‍ 17ന് യോഗം ചേര്‍ന്നിട്ടില്ലെന്ന് താന്‍ പറഞ്ഞിട്ടില്ല. സെപ്തംബര്‍ 17ലെ യോഗത്തിന്റെ മിനുട്സ് കണ്ടിട്ടില്ല. അനുമതി നല്‍കിയ ഉത്തരവില്‍ ഇറിഗേഷന്‍ വകുപ്പിന്റെ പേരില്ല. യോഗം ചേരുന്നതിന് പ്രശ്‌നമില്ല, തീരുമാനം എടുത്തത്തിലാണ് പ്രശ്നം. യോഗത്തില്‍ മരം മുറിക്കാന്‍ തീരുമാനം എടുത്തെങ്കില്‍ അത് താന്‍ അറിഞ്ഞില്ല. അക്കാര്യം അന്വേഷിക്കപ്പെടണമെന്നും മന്ത്രി പറഞ്ഞു.

മരംമുറി ഉത്തരവുമായി ബന്ധപ്പെട്ട എല്ലാ കാര്യങ്ങളും ചീഫ് സെക്രട്ടറി അന്വേഷിക്കുന്നുണ്ടെന്നും താന്‍ ഒരു ഉദ്യോഗസ്ഥനും ക്ലീന്‍ ചിറ്റ് നല്‍കിയിട്ടില്ലെന്നും മന്ത്രി ആവര്‍ത്തിച്ചു. കെ ജോസ് യോഗത്തില്‍ പങ്കെടുത്തതായി മിനുട്‌സ് ഉണ്ടെങ്കില്‍ അദ്ദേഹത്തിനെതിരെ നടപടിയെടുക്കാന്‍ മുഖ്യമന്ത്രിയോട് ആവശ്യപ്പെടും. ചീഫ് സെക്രട്ടറിയുടെ അന്വേഷണറിപ്പോര്‍ട്ട് വരട്ടെ. സര്‍ക്കാര്‍ റദ്ദാക്കിയ തീരുമാനത്തിന് ഇനിയെന്ത് പ്രസക്തിയെന്നും മന്ത്രി മാധ്യമങ്ങളോട് പറഞ്ഞു.