ആംസ്റ്റര്‍ഡാം: കൊവിഡ് രോഗികളുടെ എണ്ണം ക്രമാതീതമായി വര്‍ധിച്ചതിനെത്തുടര്‍ന്ന് നെതര്‍ലന്‍ഡില്‍ ലോക്ഡൗണ്‍ പ്രഖ്യാപിച്ചു. ഇടക്കാല പ്രധാനമന്ത്രി മാര്‍ക്ക് റൂട്ട് ആണ് ലോക്ഡൗണിന്റെ ഭാഗമായുള്ള നിയന്ത്രണങ്ങള്‍ പ്രഖ്യാപിച്ചത്. മൂന്നാഴ്ച ലോക്ഡൗണ്‍ നീളും.

ബാറുകള്‍, റെസ്റ്റോറന്റുകള്‍ എന്നിവ 8 മണിക്ക് പൂട്ടണം. അവശ്യ വിഭാഗത്തില്‍ ഉള്‍പ്പെടാത്ത കടകളും മറ്റും വൈകുന്നേരം ആറ് മണിക്ക് പൂട്ടണം. വീടുകളില്‍ ഒത്തുച്ചേരുമ്പോള്‍ നാലില്‍ കൂടുതല്‍ ആളുകള്‍ പാടില്ല. വര്‍ക്ക് ഫ്രം ഹോം സ്വീകരിക്കണം. എന്നാല്‍ സ്‌കൂളുകളും സിനിമാ തിയേറ്ററുകളും അടയ്ക്കില്ല.

ഇന്നലെ മാത്രം 16,364 പേര്‍ക്കാണ് നെതര്‍ലന്‍ഡില്‍ രോഗം സ്ഥിരീകരിച്ചത്. രാജ്യത്തെ 82 ശതമാനം ആളുകളും വാക്‌സിന്‍ സ്വീകരിക്കുകയും ചെയ്തിട്ടുണ്ട്.

നേരത്തെ കൊവിഡ് അതിരൂക്ഷമായ സാഹചര്യത്തില്‍ പോലും പ്രതിദിന രോഗികളുടെ എണ്ണം പതിമൂവായ്യിരം കടന്നിരുന്നില്ല.

അതേസമയം നിയന്ത്രണങ്ങള്‍ക്കെതിരെ ജനം തെരുവിലിറങ്ങി. പൊലിസിന് നേരെ പടക്കമെറിഞ്ഞത് സംഘര്‍ഷത്തിനിടയാക്കി. ഹേഗില്‍ നൂറുകണക്കിന് പ്രതിഷേധക്കാര്‍ക്ക് നേരെ പൊലിസ് ജലപീരങ്കി പ്രയോഗിച്ചു.