സ്വന്തം ലേഖകൻ
തിരുവനന്തപുരം
പാർട്ടിയുടെ രാജ്യാന്തര മുഖമായ ഡോ. ശശി തരൂർ എം.പിയുടെ സ്വതന്ത്ര അഭിപ്രായങ്ങളെ ഉൾക്കൊള്ളാനാവാതെ കോൺഗ്രസ്.
അഭിപ്രായങ്ങളുടെ പേരിൽ പാർട്ടിക്ക് വഴങ്ങിക്കൊടുക്കാതെ തരൂരും നിലയുറപ്പിച്ചതോടെ സംസ്ഥാന കോൺഗ്രസിന് അതു പുതിയ തലേവദനയായി.
ഏറ്റവുമൊടുവിൽ കെ റെയിലിന്റെ കാര്യത്തിലുള്ള തരൂരിന്റെ നിലപാടാണ് സംസ്ഥാന നേതൃത്വത്തെ പ്രതിസന്ധിയിലാക്കിയത്. അതിന്റെ വിവാദം നിലനിൽക്കെ തന്നെ തരൂർ മുഖ്യമന്ത്രി പിണറായി വിജയനെ പുകഴ്ത്തിയതാണ് പാർട്ടിക്ക് കൂടുതൽ തലവേദന വരുത്തിവച്ചത്. ഇതു വിവാദമായതോടെ നിലപാട് ആവർത്തിച്ച് തരൂർ ഇന്നലെ ഒരു കുറിപ്പും പങ്കുവച്ചു.
രാഷ്ട്രീയ വ്യത്യാസങ്ങൾ മാറ്റിവച്ച് വളർച്ചയ്‌ക്കൊപ്പം നിൽക്കേണ്ടതുണ്ടെന്നും ചില വിഷയങ്ങളിൽ രാഷ്ട്രീയം മാറ്റിവയ്ക്കാൻ എല്ലാവരും തയാറാവണമെന്നുമാണ് കുറിപ്പ്. കൂടാതെ കുറിപ്പിനൊപ്പം പിണറായിക്കൊപ്പമുള്ള ചിത്രവും അദ്ദേഹം പങ്കുവച്ചു.
കെ റെയിൽ വിഷയത്തിൽ റെയിൽവേ മന്ത്രിയെ കണ്ട് അദ്ദേഹത്തിനു നൽകാനുള്ള നിവേദത്തിൽ കേരളത്തിലെ എല്ലാ യു.ഡി.എഫ് എം.പിമാരും ഒപ്പുവച്ചെങ്കിലും തരൂർ മാറിനിൽക്കുകയായിരുന്നു. കോൺഗ്രസും യു.ഡി.എഫും പദ്ധതിക്കെതിരേ പ്രക്ഷോഭവുമായി മുന്നോട്ടുപോകുമ്പോൾ സമൂഹമാധ്യമങ്ങളിൽ വലിയ സ്വീകാര്യതയും അഭിപ്രായ രൂപീകരണശേഷിയുമുള്ള തരൂരിന്റെ വിട്ടുനിൽക്കൽ പാർട്ടിക്ക് വലിയ ക്ഷീണം വരുത്തിവയ്ക്കുകയുമുണ്ടായി. പദ്ധതി സംബന്ധിച്ച് കുറച്ചുകൂടി പഠിക്കാനുണ്ടെന്നായിരുന്നു തരൂരിന്റെ പ്രതികരണം.
ഈയടുത്തായി രണ്ടുതവണയാണ് പിണറായിയെ പുകഴ്ത്തി തരൂർ സമൂഹമാധ്യമങ്ങളിൽ അഭിപ്രായം പങ്കുവച്ചത്. തിരുവനന്തപുരത്ത് ലുലു മാളിന്റെ ഉദ്ഘാടനച്ചടങ്ങിലാണ് ഏറ്റവുമൊടുവിൽ പിണറായിയെ പുകഴ്ത്തിയത്.
കേരളത്തിന്റെ വികസനത്തിനു തടസ്സം നിൽക്കുന്ന കാര്യങ്ങളെ മാറ്റാൻ ശ്രമിക്കുന്നയാളാണ് മുഖ്യമന്ത്രിയെന്നായിരുന്നു കെ റെയിൽ വിരുദ്ധ പ്രചാരണവുമായി കോൺഗ്രസ് മുന്നോട്ടുപോകുമ്പോൾ തരൂർ അഭിപ്രായപ്പെട്ടത്.
തരൂരിനെതിരേ മുതിർന്ന നേതാക്കളായ മുല്ലപ്പള്ളി രാമചന്ദ്രനും കെ. മുരളീധരനും വിമർശനവുമായി രംഗത്തുവന്നപ്പോൾ രമേശ് ചെന്നിത്തല അദ്ദേഹത്തെ പിന്തുണയ്ക്കുകയാണുണ്ടായത്.
എല്ലാ കാര്യത്തിലും സ്വന്തമായി കാഴ്ചപ്പാടും നിലപാടുമുള്ളയാളാണ് തരൂരെന്നും അദ്ദേഹം എപ്പോഴും പാർട്ടിയുടെ ചട്ടക്കൂടിനുള്ളിൽ നിന്നാണ് പ്രവർത്തിച്ചിട്ടുള്ളതെന്നുമാണ് ചെന്നിത്തലയുടെ അഭിപ്രായം. തരൂരിനെ ഒറ്റയടിക്ക് തള്ളാതെയായിരുന്നു കെ.പി.സി.സി അധ്യക്ഷൻ കെ. സുധാകരന്റെ പ്രതികരണം.