വര്‍ഗീയതയ്ക്ക് ഇടം നല്‍കാത്ത നാടാണ് കേരളമെന്ന് തെലങ്കാന മുഖ്യമന്ത്രി രേവന്ത് റെഡ്ഡി. രാഹുല്‍ ഗാന്ധി പറഞ്ഞത് എന്റെ കുടുംബമാണ് എന്നാണ്. ഇന്‍ഡ്യ മുന്നണിക്ക് മാതൃകയാണ് യുഡിഎഫ്. നമ്മുടെ സംസ്‌കാരത്തെയും അടുത്ത തലമുറയെയും സംരക്ഷിക്കാന്‍ വര്‍ഗീയ ശക്തികള്‍ക്കെതിരെ പോരാട്ടം തുടരണമെന്നും രേവന്ത് റെഡ്ഡി പറഞ്ഞു.

മുസ്ലിം ലീഗ് സംസ്ഥാന അധ്യക്ഷന്‍ സാദിഖലി ശിഹാബ് തങ്ങളുടെ സ്‌നേഹസദസ്സ് ഉദ്ഘാടനം ചെയ്ത് സംസാരിക്കുകയായിരുന്നു രേവന്ത് റെഡ്ഡി. രാജ്യത്തെ എല്ലാ വിഭാഗവും ഒന്നിച്ച് ജീവിക്കാനാണ് ആഗ്രഹിക്കുന്നത്. കേരളം ഇക്കാര്യത്തില്‍ മാതൃകയാണ്. കേരളത്തില്‍ വര്‍ഗീയ ശക്തികള്‍ക്ക് ഇടം നല്‍കിയിട്ടില്ല. സ്‌നേഹ സദസിന്റെ സന്ദേശം രാജ്യം മുഴുവന്‍ വേണമെന്നും അതിന് വേണ്ടി ശ്രമിക്കുമെന്നും രേവന്ത് റെഡ്ഡി വ്യക്തമാക്കി.