ന്യൂഡല്‍ഹി: പൊതുജനങ്ങളില്‍ നിന്നും സംഭാവന സ്വീകരിക്കാന്‍ എന്‍സിപി ശരദ് പവാര്‍ വിഭാഗത്തിന് അനുമതി നല്‍കി
തെരഞ്ഞെടുപ്പ് കമ്മീഷന്‍. ഔദ്യോഗിക എന്‍സിപിയായി അജിത് പവാര്‍ പക്ഷത്തിന് അംഗീകാരം നല്‍കിയതോടെയാണ് സംഭാവന വാങ്ങാനുള്ള അവകാശം ശരദ് പവാര്‍ പക്ഷത്തിന് നഷ്ടപ്പെട്ടത്. തുടര്‍ന്ന് അനുമതിക്കായി ശരദ് പവാര്‍ വിഭാഗം ഇലക്ഷന്‍ കമ്മീഷനെ സമീപിക്കുകയായിരുന്നു. 

മഹാരാഷ്ട്ര നിയമസഭ തെരഞ്ഞെടുപ്പ് അടുത്ത സാഹചര്യത്തില്‍ സംഭാവന സ്വീകരിക്കാന്‍ അനുവാദം വേണമെന്നാണ് പവാര്‍ വിഭാഗം ആവശ്യപ്പെട്ടത്. വര്‍ക്കിംഗ് പ്രസിഡന്റ് സുപ്രിയ സുലെയുടെ നേതൃത്വത്തിലാണ് പാട്ടി നേതാക്കള്‍ ഇന്ന് കമ്മീഷന്‍ ആസ്ഥാനത്ത് എത്തിയത്. ഈ സാഹചര്യത്തിലാണ് സ്വമേധയാ ജനങ്ങള്‍ നല്‍കുന്ന സംഭാവന സ്വീകരിക്കാനുള്ള അനുമതി നല്‍കി ഉത്തരവായത്.