ആലപ്പുഴ: ആലപ്പുഴ പൂച്ചാക്കലില്‍ നടുറോഡില്‍ ദലിത് പെണ്‍കുട്ടിക്ക്  ക്രൂര മര്‍ദനം. സി.പി.എം പ്രവര്‍ത്തകരാണ് പ്രതികള്‍. 19കാരിയാണ് ആക്രമണത്തിനിരയായത്. എന്നാല്‍ സംഭവത്തിന്റെ ദൃശ്യങ്ങള്‍ പുറത്തു വന്നിട്ടും പ്രതികളെ അറസ്റ്റ് ചെയ്യാന്‍ പൊലിസ് തയ്യാറായിട്ടില്ല.  

തന്നെ ക്രൂരമായി മര്‍ദിച്ചെന്നും വസ്ത്രം വലിച്ചുകീറിയെന്നും പെണ്‍കുട്ടി പരാതിയില്‍ പറയുന്നു.  എഴുന്നേല്‍ക്കാനും നടക്കാനും പോലും പറ്റാത്ത അവസ്ഥയാണെന്നും തുറവൂരിലെ ആശുപത്രിയില്‍ ചികിത്സയില്‍ കഴിയുന്ന പെണ്‍കുട്ടി പറഞ്ഞു.

അനിയന്‍മാരെ ആക്രമിച്ചതിന് പൊലിസില്‍ പരാതി നല്‍കിയ വൈരാഗ്യത്തിലാണ് പെണ്‍കുട്ടിക്ക് നേരെ റോഡില്‍ ആക്രമണമുണ്ടായത്. സഹോദരങ്ങളെ ഉപദ്രവിക്കുന്നത് തടയാന്‍ ചെന്നപ്പോള്‍ പെണ്‍കുട്ടിക്ക് മര്‍ദനമേല്‍ക്കുകയായിരുന്നു. സിപിഎം പ്രവര്‍ത്തകനായ ഷൈജുവും സഹോദരനും ചേര്‍ന്നാണു ആക്രമിച്ചത്. 

ഇന്നലെയാണ് ആക്രമണത്തിന്റെ ദൃശ്യങ്ങള്‍ പുറത്തുവന്നത്. പ്രതികളെ അറസ്റ്റ് ചെയ്യണമെന്നാവശ്യപ്പെട്ട് പ്രതിഷേധമുണ്ട്. സംഭവത്തില്‍ ജാമ്യമില്ലാ വകുപ്പ് പ്രകാരം പൊലിസ് കേസെടുത്തിട്ടുണ്ട്.