തിരുവനന്തപുരം: ഹേമ കമ്മിറ്റി റിപ്പോര്‍ട്ടിലെ സര്‍ക്കാര്‍ വെട്ടിമാറ്റിയ ഭാഗങ്ങള്‍ പുറത്തുവിടുന്ന കാര്യത്തില്‍ ഇന്ന് ഉത്തരവില്ല. ഇതുസംബന്ധിച്ച് വിവരാവകാശ കമ്മിഷന്റെ ഉത്തരവ് ശനിയാഴ്ച പുറത്തിറങ്ങിയേക്കുമെന്ന റിപ്പോര്‍ട്ടുകള്‍ ഉണ്ടായിരുന്നെങ്കിലും ഇന്ന് പുറത്തുവിടില്ലെന്നാണ് വിവരം. റിപ്പോര്‍ട്ട് പുറത്തുവിടരുതെന്ന് ആവശ്യപ്പെട്ട്‌ ഒരു പരാതി കൂടി ലഭിച്ച സാഹചര്യത്തിലാണ് നടപടി. 

വിവരാവകാശ നിയമപ്രകാരം, വെട്ടിമാറ്റിയ ഭാഗങ്ങള്‍ ഉള്‍പ്പെടെ നല്‍കണമെന്നാവശ്യപ്പെട്ടാണ് മാധ്യമപ്രവര്‍ത്തകര്‍ അപ്പീല്‍ നല്‍കിയത്. വിവരാവകാശ കമ്മിഷന്‍ ഒഴിവാക്കാന്‍ നിര്‍ദേശിച്ചതിനപ്പുറം റിപ്പോര്‍ട്ടിലെ ചില പേജുകളിലെ ഭാഗങ്ങള്‍ സര്‍ക്കാര്‍ സ്വന്തംനിലയില്‍ ഒഴിവാക്കിയിരുന്നു. 49 മുതല്‍ 53 വരെയുള്ള പേജുകളായിരുന്നു ഇത്തരത്തില്‍ വെട്ടിയത്. 

മലയാളസിനിമാരംഗത്തെ സ്ത്രീ അഭിനേതാക്കള്‍ നേരിടുന്ന ചൂഷണം സംബന്ധിച്ചാണ് ജസ്റ്റിസ് ഹേമയുടെ നേതൃത്വത്തിലുള്ള കമ്മിഷന്‍ സര്‍ക്കാരിന് റിപ്പോര്‍ട്ട് സമര്‍പ്പിച്ചത്. നാലരവര്‍ഷം പൂഴ്ത്തിവച്ച റിപ്പോര്‍ട്ട് കഴിഞ്ഞ ഓഗസ്റ്റ് 19നാണ് വിവരാവകാശ കമ്മിഷന്റെ ഇടപെടലിനെ തുടര്‍ന്ന് അപൂര്‍ണമായ നിലയില്‍ സര്‍ക്കാര്‍ പുറത്തുവിട്ടത്. അപേക്ഷകരെ അറിയിക്കാതെയാണ് സാംസ്‌കാരിക വകുപ്പ് റിപ്പോര്‍ട്ടില്‍ കടുംവെട്ട് നടത്തിയത്.