ന്യൂഡല്‍ഹി: വലിയ രീതിയില്‍ ക്രമക്കേട് നടന്നുവെന്ന് വ്യക്തമായാല്‍ മാത്രമേ നീറ്റില്‍ പുനഃപരീക്ഷക്ക് ഉത്തരവിടാനാകുവെന്ന് സുപ്രിം കോടതി. നീറ്റുമായി ബന്ധപ്പെട്ട നാല്‍പതിലേറെ ഹരജികള്‍ പരിഗണിക്കുന്നതിനിടെയാണ് ചീഫ് ജസ്റ്റിസ് ഡി.വൈ ചന്ദ്രചൂഢിന്റെ പരാമര്‍ശം.

പേപ്പര്‍ ചോര്‍ച്ച മുഴുവന്‍ പരീക്ഷാര്‍ഥികളേയും ബാധിച്ചുവെന്ന് വ്യക്തമായി തെളിയിക്കാന്‍ പറ്റിയാല്‍ മാത്രമേ പരീക്ഷ കാന്‍സല്‍ ചെയ്യുന്നതിനെ കുറിച്ച് ചിന്തിക്കാന്‍ കഴിയൂ. ചീഫ് ജസ്റ്റിസ് ഹരജിക്കാരെ പ്രതിനിധീകരിക്കുന്ന അഭിഭാഷകന്‍ അഡ്വ. നരേന്ദ്ര ഹൂഡയോട് വ്യക്തമാക്കി. 23 ലക്ഷത്തില്‍ ഒരു ലക്ഷത്തിന് മാത്രമേ അഡ്മിഷന്‍ ലഭിക്കൂ എന്നത് കൊണ്ട് പുനഃപരീക്ഷക്ക് ഉത്തരവിടാന്‍ കഴിയില്ല. വലിയ രീതിയില്‍ ക്രമക്കേട് നടന്നുവെന്ന് വ്യക്തമായാല്‍ മാത്രമേ നീറ്റില്‍ പുനഃപരീക്ഷക്ക് ഉത്തരവിടാനാകൂ-കോടതി ചൂണ്ടിക്കാട്ടി. 

ചോദ്യപേപ്പര്‍ ചോര്‍ച്ച സംഘടിതമായി നടത്തിയതാണെന്ന് ബോധ്യപ്പെടണമെന്നും കോടതി വ്യക്തമാക്കി. നീറ്റില്‍ ഇന്ന് തന്നെ തീരുമാനമെടുക്കുമെന്നും സുപ്രിം കോടതി അറിയിച്ചു. ചീഫ് ജസ്റ്റിസ് ഡി.വൈ.ചന്ദ്രചൂഢ് അധ്യക്ഷനായ ബെഞ്ചാണ് നീറ്റുമായി ബന്ധപ്പെട്ട ഹരജികള്‍ പരിഗണിക്കുന്നത്. ജസ്റ്റിസ് ജെ.ബി പാര്‍ദിവാല, മനോജ് മിശ്ര എന്നിവരും ബെഞ്ചില്‍ അംഗങ്ങളാണ്.