മൂന്നാര്‍ ഗ്യാപ് റോഡിലൂടെ നിരോധനം ലംഘിച്ചെത്തിയ സ്‌കുള്‍ ബസിന്റെ യാത്ര തടഞ്ഞ് പൊലിസ്. അപകട സാധ്യത അവഗണിച്ച് വിദ്യാര്‍ഥികളെയും,അധ്യാപകരെയും വഹിച്ചുകൊണ്ട് വന്ന ചിന്നക്കനാലിലെ അണ്‍ എയ്ഡഡ് സ്‌കൂളിന്റെ ബസാണ് പൊലിസ് തടഞ്ഞ് തിരിച്ചയച്ചത്. ഗ്യാപ് റോഡിലെ ഗതാഗത നിരോധനവും, പ്രതികൂല കാലാവസ്ഥയും കാരണം അവധി ആവശ്യപ്പെട്ടെങ്കിലും പ്രിന്‍സിപ്പാള്‍ അതിനനുവദിച്ചില്ലെന്നാണ് രക്ഷിതാക്കളുടെ പരാതി. 

ജില്ലാ ഭരണകൂടം അവധി പ്രഖ്യാപിക്കാത്തതിനാലാണ് സ്‌കൂള്‍ പ്രവര്‍ത്തിച്ചതെന്നും, ഡ്രൈവര്‍ക്ക് ഗ്യാപ് റോഡ് വഴി വരരുതെന്ന് നിര്‍ദ്ദേശം നല്‍കിയിരുന്നുവെന്നും അയാളത് അനുസരിച്ചില്ലെന്നുമാണ് സ്‌കൂള്‍ അധികൃതരുടെ വാദം. ഡ്രൈവര്‍ക്കെതിരെ കര്‍ശനമായ നടപടിയെടുക്കുമെന്ന് സ്‌കൂള്‍  പ്രിന്‍സിപ്പാള്‍ അറിയിച്ചു. യാതൊരു മുന്നറിയിപ്പും പാലിക്കാതെയുള്ള ഇത്തരം പ്രവര്‍ത്തികളാണ് പിന്നീട് വന്‍ അപകടങ്ങളായി പരിണമിക്കുന്നതെന്ന വിമര്‍ശനവും ഉയരുന്നുണ്ട്.

അതേസമയം സംസ്ഥാനത്ത് കനത്ത മഴ തുടരുന്ന സാഹചര്യത്തില്‍ രണ്ടു ജില്ലകളില്‍ റെഡ് അലര്‍ട്ടും, എട്ട് ജില്ലകളില്‍ ഓറഞ്ച് അലര്‍ട്ടും പ്രഖ്യാപിച്ചിട്ടുണ്ട്. വയനാട്, കണ്ണൂര്‍, എന്നിവിടങ്ങളിലാണ് റെഡ് അലര്‍ട്ട് പ്രഖ്യാപിച്ചിട്ടുള്ളത്. കാസര്‍കോട്, കോഴിക്കോട്, മലപ്പുറം, പാലക്കാട്, തൃശൂര്‍, ഇടുക്കി, എറണാകുളം, കോട്ടയം ജില്ലകളിലാണ് ഓറഞ്ച് അലര്‍ട്ട്. ആലപ്പുഴ, പത്തനംതിട്ട, കൊല്ലം, ജില്ലകളില്‍ യെല്ലോ അലര്‍ട്ടും പ്രഖ്യാപിച്ചിട്ടുണ്ട്.