വയനാട് മുണ്ടക്കൈ ദുരന്തമുഖത്ത് വ്യോമസേനയുടെ ഹെലികോപ്ടറെത്തി. ഇവിടെ കുടുങ്ങിക്കിടക്കുന്ന ജനങ്ങളെ എയര്‍ലിഫ്റ്റിങ് നടത്തി പുറത്തെത്തിക്കാനാണ് ശ്രമിക്കുന്നത്. നിലവില്‍ 45 ക്യാമ്പുകള്‍ ജില്ലയില്‍ സജ്ജമാക്കിയിട്ടുണ്ട്.

ഒറ്റപ്പെട്ടു പോയ ആയിരക്കണക്കിന് ആളുകളെ പുറത്തെത്തിക്കാനായി സൈന്യം താല്കാലിക പാലം ഒരുക്കിയിട്ടുണ്ട്.  ഇവിടെ നേരത്തെയുണ്ടായിരുന്ന പാലം പാടെ ഒലിച്ചു പോയിരുന്നു. ഇതിലൂടെയും കൂടുതല്‍ ആളുകളെ രക്ഷപ്പെടുത്താനാണ് നീക്കം. 

കേരളം ഇതുവരെ കണ്ടതില്‍ വെച്ച് അതീവ ദാരുണമായ ദുരന്തമാണ് വയനാട് ചൂരല്‍ മലയില്‍ ഉണ്ടായതെന്ന് മുഖ്യമന്ത്രി പിണറായി വിജയന്‍. ജീവന്‍ നഷ്ടപ്പെട്ടവര്‍ക്ക് ആദരാജ്ഞലി അര്‍പ്പിച്ച മുഖ്യമന്ത്രി ഹൃദയഭേദഗമായ വാര്‍ത്തകളാണ് വരുന്നതെന്നും പറഞ്ഞു. തിരുവനന്തപുരത്ത് വാര്‍ത്ത സമ്മേളനത്തില്‍ സംസാരിക്കുകയായിരുന്നു അദ്ദേഹം. ഇന്നലെ രാത്രി ഉറങ്ങാന്‍ കിടന്നവരാണ് ദുരന്തത്തില്‍പ്പെട്ടത്. സൈന്യം മുണ്ടക്കൈ മാര്‍ക്കറ്റിലെത്തിയിട്ടുണ്ട്. രക്ഷാപ്രവര്‍ത്തനം തുടരുകയാണെന്നും മുഖ്യമന്ത്രി പറഞ്ഞു. 

പ്രധാനമന്ത്രി നരേന്ദ്ര മോദി, പ്രതിപക്ഷ നേതാവ് രാഹുല്‍ ഗാന്ധി, അമിത് ഷാ, തമിഴ്‌നാട് മുഖ്യമന്ത്രി എംകെ സ്റ്റാലിന്‍, ബംഗാള്‍ ഗവര്‍ണര്‍ സിവി ആനന്ദബോസ് എന്നിവര്‍ വിളിച്ച് സഹായം വാഗ്ദാനം ചെയ്തു. കേരളത്തിലെ പ്രതിപക്ഷ നേതാവ്, പ്രതിപക്ഷ ഉപനേതാവും മുന്‍ പ്രതിപക്ഷ നേതാവും ഒരുമിച്ച് നീങ്ങാനുള്ള തീരുമാനം അറിയിച്ചു. അഞ്ച് മന്ത്രിമാര്‍ വയനാട്ടില്‍ പ്രവര്‍ത്തനം ഏകോപിപ്പിക്കുന്നു. സൈന്യത്തിന്റെ സഹായമടക്കം സാധ്യമായ എല്ലാം ഒരുക്കി. രക്ഷാപ്രവര്‍ത്തനം പുരോഗമിക്കുകയാണ്. സേനാവിഭാഗങ്ങള്‍ സഹായിക്കുന്നുണ്ട്. പരമാവധി ജീവന്‍ രക്ഷിക്കാനും പരിക്കേറ്റവര്‍ക്ക് മികച്ച ചികിത്സ ഉറപ്പാക്കാനും ശ്രമിക്കും. ജില്ലയില്‍ 45 ക്യാമ്പുകളിലായി 3096 പേരെ പാര്‍പ്പിച്ചിട്ടുണ്ട്.

indian airforce airlifting people in wayanad mundakkai