തെല്‍ അവിവ്: ഹമാസ് നേതാവ് ഇസ്മാഈല്‍ ഹനിയ്യയുടെ വധത്തിന് തിരിച്ചടിയെന്നോണം ഇസ്‌റാഈലിന് നേരെ ആക്രമണം ശക്തമാക്കി ഹിസ്ബുല്ല. ഇസ്‌റആഈലിലെക്ക് കനത്ത റോക്കറ്റാക്രമണമാണ് ഹിസ്ബുല്ലയുടെ ഭാഗത്തു നിന്ന് ഉണ്ടായിരിക്കുന്നത്. 
വടക്കന്‍ ഇസ്‌റാഈലിലെ ബൈത്ത് ഹിലെല്‍ മേഖലയിലേക്കാണ് ആക്രമണം നടത്തിയത്. പിന്നാലെ പ്രദേശം കനത്ത യുദ്ധഭീതിയിലായിരിക്കുകയാണ്. 

ലെബനാനിലെ ജനങ്ങള്‍ക്ക് നേരെ ഇസ്‌റാഈല്‍ നടത്തുന്ന ആക്രമണങ്ങള്‍ക്കുള്ള തിരിച്ചടിയാണിതെന്ന് ഹിസ്ബുല്ല അറിയിച്ചു. നിരവധി റോക്കറ്റുകള്‍ ഇസ്രാഈലിന്റെ അയേണ്‍ ഡോം വ്യോമപ്രതിരോധ സംവിധാനം തടഞ്ഞു.

നേരത്തെ, തെക്കന്‍ ലെബനാനിലേക്ക് ഇസ്‌റാഈല്‍ ഒന്നിലേറെ ആക്രമണങ്ങള്‍ നടത്തിയിരുന്നു. ഡ്രോണ്‍ ആക്രമണത്തില്‍ ഒരു ഹിസ്ബുല്ല അംഗം കൊല്ലപ്പെടുകയുമുണ്ടായി. ഇസ്മാഈല്‍ ഹനിയ്യയുടെ വധത്തിന് പിന്നാലെ യുദ്ധസമാന ഭീതിയിലാണ് പശ്ചിമേഷ്യന്‍ മേഖല. ഹനിയ്യയുടെ കൊലപാതകത്തിന് ശക്തമായി തിരിച്ചടിക്കുമെന്ന് ഇറാനും ഇസ്‌റാഈലിന് മുന്നറിയിപ്പ് നല്‍കിയിരുന്നു. 

അതിനു പിന്നാലെ ഇറാനെ പ്രതിരോധിക്കാന്‍ ഇസ്‌റാഈലിന് യു.എസ് പ്രസിഡന്റ് ജോ ബൈഡന്‍ കൂടുതല്‍ സൈനിക സഹായം വാഗ്ദാനം ചെയ്തിട്ടുണ്ട്. പശ്ചിമേഷ്യന്‍ മേഖലയിലേക്ക് വിമാന വാഹിനികപ്പല്‍ അയക്കാനും പെന്റഗണ്‍ തീരുമാനിച്ചിട്ടുണ്ട്. സംഘര്‍ഷ സാധ്യത രൂക്ഷമായ സാഹചര്യത്തില്‍ പശ്ചിമേഷ്യന്‍ മേഖലയിലേക്ക് ബാലിസ്റ്റിക് മിസൈല്‍ പ്രതിരോധ ശേഷിയുള്ള ക്രൂയിസറുകളും ഡിസ്‌ട്രോയറുകളും യുദ്ധവിമാനങ്ങളും വിന്യസിക്കാന്‍ യു.എസ് പ്രതിരോധ വകുപ്പ് ഉത്തരവിടുകയും ചെയ്തു. കര അധിഷ്ടിത ബാലിസ്റ്റിക് മിസൈല്‍ പ്രതിരോധ ആയുധങ്ങള്‍ അയക്കാനും നടപടി സ്വീകരിച്ചായി യു.എസ് സ്റ്റേറ്റ് ഡിപാര്‍ട്‌മെന്റ് അറിയിച്ചു.

അതേസമയം, ഗസ്സയിലെ കൂട്ടക്കുരുതി ശക്തമായി തുടരുകയാണ് ഇസ്‌റാഈല്‍. കഴിഞ്ഞ മണിക്കൂറുകളുലും അഭയാര്‍ഥികള്‍ താമസിക്കുന്ന ഗസ്സയിലെ സ്‌കൂളിനും ആശുപത്രിക്കും നേരെ ഇസ്‌റാഈല്‍ ആക്രമണം നടത്തിയിരുന്നു.