കണ്ണൂര്‍: ഫണ്ട് വകയിരുത്താതെയും സുതാര്യ ടെന്‍ഡര്‍ അട്ടിമറിച്ചും സംസ്ഥാനത്ത് ഒരു നിര്‍മാണ പ്രവൃത്തിയും നല്‍കരുതെന്നും ഇത്തരം പ്രവൃത്തികളെ ആരും അനുകൂലിക്കരുതെന്നും കേരള ഗവണ്‍മെന്റ് കോണ്‍ട്രാക്ടേഴ്‌സ് അസോസിയേഷന്‍ സംസ്ഥാന പ്രസിഡന്റ് വര്‍ഗീസ് കണ്ണമ്പള്ളി ആവശ്യപ്പെട്ടു. കേന്ദ്ര വിജിലന്‍സ് കമ്മിഷന്റെയും സുപ്രിംകോടതിയുടെയും നിര്‍ദേശങ്ങള്‍ക്കു വിരുദ്ധമാണു മലയോര ഹൈവേ ഉള്‍പ്പടെയുള്ള കാര്യത്തില്‍ നടന്നത്. പൊതുപണം ഉപയോഗിച്ച് നടത്തുന്ന നിര്‍മാണ പ്രവൃത്തികള്‍ സുതാര്യ ടെന്‍ഡറിലൂടെ മാത്രം ഏജന്‍സികളെ ഏല്‍പ്പിക്കാന്‍ ഭരണഘടനാപരമായി സര്‍ക്കാരിനു ബാധ്യതയുണ്ട്. എന്നാല്‍ ഭരണ-പ്രതിപക്ഷ എം.എല്‍.എമാരുടെ ഒരേ ശൈലിയിലുള്ള ശുപാര്‍ശ കത്തുകള്‍ വാങ്ങി ഏതെങ്കിലും ഏജന്‍സികള്‍ക്കു മാത്രം നല്‍കുന്നതു നിര്‍മാണ മേഖലയെ അഴിമതിയിലേക്കു നയിക്കും. വാര്‍ത്താസമ്മേളനത്തില്‍ ജില്ലാ പ്രസിഡന്റ് സി രാജന്‍, സെക്രട്ടറി സി.പി ദിവാകരന്‍, കെ.കെ സുരേഷ്ബാബു, എം മുഹമ്മദ് കുഞ്ഞി സംബന്ധിച്ചു.