മഞ്ചേശ്വരം (കാസർകോട്): കാസർകോട് ജില്ലയിലെ 85 കന്നഡ വിദ്യാലയങ്ങളിലും ഇടുക്കിയിലെ 52 തമിഴ് വിദ്യാലയങ്ങളിലും മലയാള പഠനം ആരംഭിച്ചിട്ട് മൂന്നുവർഷം പിന്നിട്ടിട്ടും പാഠപുസ്തകം തയാറായില്ല. മഞ്ചേശ്വരം താലൂക്ക് ഭരണഭാഷാ വികസന സമിതിയുടെ ശ്രമഫലമായി 2021ൽ ആരംഭിച്ച മലയാളപഠനം ഇപ്പോൾ മൂന്നാം ക്ലാസ് വരെ എത്തിനിൽക്കുന്നു. പാഠപുസ്തകമോ കൈപ്പുസ്തകമോ ഇല്ലാത്തത് അധ്യാപകരെയും വിദ്യാർഥികളെയും ബുദ്ധിമുട്ടിലാക്കിയിരിക്കുകയാണ്.

ഒരേസേവനത്തിനായി ഒന്നിലേറെ ഏജൻസികളും ഓഫിസുകളും പ്രവർത്തിക്കുന്നത് കാലതാമസത്തിന് കാരണമായി. ഒന്നുമുതൽ നാലാം ക്ലാസ് വരെ ആവശ്യമുള്ള പുസ്തകങ്ങളുടെ സ്‌ക്രിപ്റ്റ് തയാറാക്കി 2022ൽ പാഠപുസ്തക ഓഫിസർക്ക് അയച്ചതായും അഞ്ചാം ക്ലാസ് മുതൽ സാധാരണ സ്‌കൂളിലെ പാഠപുസ്തകം പഠിപ്പിക്കാൻ നിർദേശിച്ചതായും എസ്.സി.ഇ.ആർ.ടി മഞ്ചേശ്വരം താലൂക്ക് ഭരണഭാഷാ വികസന സമിതിയെ അറിയിച്ചിരുന്നു. ഇതിനുപിന്നാലെ ഭരണഭാഷാ സമിതി പാഠപുസ്തക ഓഫിസറെ സമീപിച്ചപ്പോൾ മാത്രമാണ് എസ്.സി.ഇ.ആർ.ടിയിൽ നിന്നുലഭിച്ച സ്‌ക്രിപ്റ്റ് കേരള ബുക്‌സ് ആൻഡ് പബ്ലിക്കേഷൻസ് സൊസൈറ്റിക്ക് കൈമാറിയത്.

സൊസൈറ്റി പാഠ പുസ്തകങ്ങളുടെ അച്ചടിയുടെ പ്രൂഫ് തയാറാക്കി പരിശോധനയ്ക്കായി എസ്.സി.ഇ.ആർ.ടിക്ക് കൈമാറി കാത്തിരിക്കുകയാണ്. അനുമതി ലഭിക്കുന്നമുറയ്ക്ക് അച്ചടി ആരംഭിക്കും. ഒന്നാം ക്ലാസ് 5000, രണ്ടാം ക്ലാസ് 4500, മൂന്നാം ക്ലാസ് 5000 പുസ്തകങ്ങളാണ് തയാറാക്കുക. നാലാം ക്ലാസിലെ പുസ്തകങ്ങളുടെ അച്ചടി പൂർത്തിയാക്കിയിട്ടുണ്ട്.

പാഠപുസ്തക പ്രകാരമുള്ള പഠനം ആരംഭിച്ചാൽ പരീക്ഷകൾ എസ്.സി.ഇ.ആർ.ടി നേതൃത്വത്തിൽ നടക്കുമെന്നും ഭരണഭാഷാ വികസന സമിതിയെ ബന്ധപ്പെട്ടവർ അറിയിച്ചിട്ടുണ്ട്. 2022ൽ എസ്.സി.ഇ.ആർ.ടി തയാറാക്കി നൽകിയ സ്‌ക്രിപ്റ്റ് രണ്ടുവർഷം താമസിപ്പിച്ച സംഭവത്തിൽ അന്വേഷണം നടത്തണമെന്നും സമിതി സർക്കാരിനോട് ആവശ്യപ്പെട്ടിട്ടുണ്ട്.

Despite starting Malayalam lessons in Kannada and Tamil medium schools in Kasaragod and Idukki three years ago, textbooks are still not ready. Teachers and students are struggling due to the delay, with multiple agencies involved in the process causing further setbacks.