മനാമ: ബഹ്‌റൈന്‍ രാജാവിന്റെ പേരില്‍ അന്താരാഷ്ട്ര തലത്തില്‍ പുതിയ പുരസ്‌കാരം ഏര്‍പ്പെടുത്താന്‍ തീരുമാനിച്ചു. സമാധാനപരമായ സഹവര്‍ത്തിത്വത്തിനുള്ള കിങ് ഹമദ് അവാര്‍ഡ് വ്യക്തികള്‍ക്കും സംഘടനകള്‍ക്കും രണ്ട് വര്‍ഷത്തിലൊരിക്കലായിരിക്കും സമ്മാനിക്കുക.

വിവിധ മതങ്ങള്‍ക്കും സംസ്‌കാരങ്ങള്‍ക്കുമിടയിലെ സമാധാനപരമായ സഹവര്‍ത്തിത്വത്തിനുള്ള പുരസ്‌കാരമാണു പുതുതായി ഏര്‍പ്പെടുത്തുന്നത്. ഇത് സംബന്ധിച്ച രാജാവിന്റെ ഉത്തരവ് പ്രകാരം കിങ് ഹമദ് സെന്റര്‍ ഫോര്‍ പീസ്ഫുള്‍ കോ എക്‌സിസ്റ്റന്‍സിന്റെ കീഴില്‍ രണ്ട് വര്‍ഷത്തിലൊരിക്കല്‍ അര്‍ഹരായ വ്യക്തികള്‍ക്കും സംഘടനകള്‍ക്കും അവാര്‍ഡ് സമ്മാനിക്കും. 

സമൂഹത്തിലെ വ്യത്യസ്ത വിഭാഗങ്ങള്‍ക്കിടയില്‍ ഐക്യം ഊട്ടിയുറപ്പിക്കാനും വിവിധ മതങ്ങളും സംസ്‌ക്കാാരങ്ങളും തമ്മില്‍ സഹവര്‍ത്തിത്വം വളര്‍ത്തുകയുമാണ്  കിംഗ് ഹമദ് സെന്ററിന്റെ പ്രധാന ലക്ഷ്യം. വ്യത്യസ്ത വീക്ഷണങ്ങള്‍ വെച്ചുപുലര്‍ത്തുന്നവര്‍ക്കിടയില്‍ സ്‌നേഹപൂര്‍ണമായ സംവാദങ്ങളും അതുവഴി സമൂഹത്തില്‍ യോജിപ്പും വളര്‍ത്താനായി സെന്റര്‍ വിവിധ പരിപാടികള്‍ സംഘടിപ്പിക്കാറുണ്ട്. സമൂഹത്തിലെ വിവിധ വിഭാഗങ്ങള്‍ക്കിടയിലെ ഐക്യം നിലനിര്‍ത്താന്‍ ശ്രമിക്കുന്നവരെയാണ് അന്താരാഷ്ട്ര തലത്തില്‍ നല്‍കുന്ന പുരസ്‌കാരത്തിനായി പരിഗണിക്കുക.

A prestigious international award has been established in the name of the Bahrain King to recognize and promote peaceful coexistence globally. Learn more about this initiative and its aim to foster harmony among nations and communities.