കണ്ണൂര്‍: ചക്കരക്കല്ലില്‍ വ്യാപാരിയെ തട്ടിക്കൊണ്ടുപോയി മര്‍ദിച്ചു പണം കവര്‍ന്നതായി പരാതി. കമാല്‍ പീടിക സ്വദേശി റഫീക്കിനെയാണ് കാറില്‍ എത്തിയ സംഘം തട്ടിക്കൊണ്ടു പോയത്. ഇന്ന് പുലര്‍ച്ചെ ആറുമണിയോടെ നടന്ന സംഭവത്തില്‍ തന്റെ കടയിലെ ജീവനക്കാരനെ സംശയിക്കുന്നതായി റഫീഖ് പറഞ്ഞു.

ബെംഗളൂരുവില്‍ ബേക്കറി നടത്തുകയാണ് റഫീഖ്. ഇവിടെ നിന്നും ബസില്‍ ഏച്ചൂര്‍ കമാല്‍ പീടികയിലെത്തിയ റഫീഖിനെ കാറിലെത്തിയ സംഘം ഭീഷണിപ്പെടുത്തി തട്ടിക്കൊണ്ടുപോകുകയും, തുടര്‍ന്ന് ക്രൂരമായി മര്‍ദിച്ച ശേഷം കൈയിലുണ്ടായിരുന്ന ഒമ്പത് ലക്ഷം രൂപ തട്ടിയെടുത്തുവെന്നും റഫീഖ് പറയുന്നു. പിന്നീട് കാപ്പാട് ഭാഗത്തെ വിജനമായ സ്ഥലത്ത് ഇറക്കിവിട്ട ശേഷം സംഘം രക്ഷപ്പെടുകയായിരുന്നു. 

ഇതിലൂടെ കടന്നുപോയ ഓട്ടോറിക്ഷ ഡ്രൈവറാണ് റഫീഖിനെ വീട്ടിലെത്തിച്ചത്. ഭാര്യയുടെ പണയം വെച്ച സ്വര്‍ണം തിരിച്ചെടുക്കാനായി കൊണ്ടുവന്ന പണമാണ് സംഘം തട്ടിയെടുത്തതെന്നും, അക്രമിസംഘത്തില്‍ ഉണ്ടായിരുന്ന നാലുപേര്‍ മുഖംമൂടി ധരിച്ചിരുന്നുവെന്നും റഫീഖ് പറയുന്നു. തട്ടിക്കൊണ്ട് പോകലിന് പിന്നില്‍ ബംഗളൂരുവിലെ തന്റെ ബേക്കറിയില്‍ ജോലി ചെയ്യുന്ന കോഴിക്കോട് സ്വദേശിയാണെന്ന് സംശയിക്കുന്നതായും റഫീഖ് പറഞ്ഞു. 

മര്‍ദ്ദനത്തില്‍ പരിക്കേറ്റ റഫീഖ് കണ്ണൂരിലെ സ്വകാര്യ ആശുപത്രിയില്‍ ചികിത്സയിലാണ്. പരാതിയില്‍ അന്വേഷണം ആരംഭിച്ചതായി ചക്കരക്കല്‍ പൊലിസ് അറിയിച്ചു.

A merchant was abducted and robbed in Chakkarakkal, Kannur, in a daring incident. Get the latest updates on this shocking crime and the ongoing investigation.