തിരുവനന്തപുരം: എ.ഡി.ജി.പി എം.ആര്‍.അജിത്കുമാറിന്റെ സ്ഥാനമാറ്റം സംബന്ധിച്ച വിഷയങ്ങള്‍ മന്ത്രിസഭാ യോഗത്തില്‍ ചര്‍ച്ചയായില്ല. വിഷയം മന്ത്രിസഭാ യോഗത്തിന്റെ അജന്‍ഡയില്‍ ഉണ്ടായിരുന്നില്ല. എ.ഡി.ജി.പി- ആര്‍.എസ്.എസ് ബന്ധത്തെക്കുറിച്ചുള്ള കാര്യങ്ങളൊന്നും സി.പി.ഐ മന്ത്രിമാരും ഉന്നയിച്ചില്ല. 

വയനാട്ടിലെ ഉരുള്‍പൊട്ടല്‍ ദുരന്തത്തില്‍പെട്ടവരുടെ പുനരധിവാസം സംബന്ധിച്ച ചീഫ് സെക്രട്ടറിയുടെ റിപ്പോര്‍ട്ട് അവതരിപ്പിക്കല്‍ മാത്രമാണ് അജന്‍ഡയ്ക്കു പുറമെ ചര്‍ച്ച ചെയ്തത്.  

അതേസമയം, വൈകിട്ട് മൂന്നു മണിക്ക് ചേരുന്ന എല്‍.ഡി.എഫ് യോഗത്തില്‍ വിഷയം ചര്‍ച്ചയാകുമെന്നാണ് കരുതുന്നത്. അജിത് കുമാറിനെതിരെ നടപടിയെടുക്കാത്തതില്‍ സി.പി.ഐക്ക് വലിയ അതൃപ്തിയുണ്ട്.

എ.ഡി.ജി.പി എം.ആര്‍ അജിത്കുമാര്‍ ആര്‍.എസ്.എസ് നേതാവുമായി കൂടിക്കാഴ്ച നടത്തിയത് അന്വേഷിക്കാന്‍ തീരുമാനിച്ചിട്ടുണ്ട്. ഡി.ജി.പി ഷെയ്ഖ് ദര്‍വേശ് സാഹിബ് നേരിട്ടാണ് അന്വേഷിക്കുക.