തിരുവനന്തപുരം: മുഖ്യമന്ത്രി വി.ഡി സതീശനും കേന്ദ്ര മന്ത്രിമാരുമായുള്ള കൂടിക്കാഴ്ച്ച ഇന്ന്. പ്രധാനമന്ത്രി നരേന്ദ്ര മോദി, ധനമന്ത്രി നിര്‍മല സീതാരാമന്‍ എന്നിവരെ കാണും. സേവാതീര്‍ഥിലെ ഓഫീസില്‍ രാവിലെ 11.15നാണ് പ്രധാനമന്ത്രിയുമായുള്ള കൂടിക്കാഴ്ച്ച.

പ്രധാനമന്ത്രിയുമായുള്ള ആദ്യ കൂടിക്കാഴ്ചയില്‍ കേളത്തിന്റെ വികസനം ചര്‍ച്ചയായേക്കും. ദേശീയപാത വികസനം, റെയില്‍വേ വികസനം, തുറമുഖ പദ്ധതികള്‍, എയിംസ്, മെട്രോ തുടങ്ങിയ പദ്ധതികള്‍ ചര്‍ച്ചയാവും. തുടര്‍ന്ന് ഉച്ചയോടെ ധനമന്ത്രി നിര്‍മല സീതാരാമനുമായി കൂടിക്കാഴ്ച്ച നടത്തും. നാളെയാണ് കേന്ദ്ര ആഭ്യന്തര മന്ത്രി അമിത് ഷായുമായുള്ള കൂടിക്കാഴ്ച്ച. 

കഴിഞ്ഞ ആഴ്ച ഡല്‍ഹിയിലെത്തി മുതിര്‍ന്ന നേതാക്കളുമായി വി ഡി സതീശന്‍ കൂടിക്കാഴ്ച നടത്തിയിരുന്നു. രാഹുല്‍ ഗാന്ധിയുമായും സോണിയ ഗാന്ധിയുമായും കൂടിക്കാഴ്ച നടത്തി. കെ സി വേണു ഗോപാലിനെയും കോണ്‍ഗ്രസ് അധ്യക്ഷന്‍ മല്ലികാര്‍ജുന്‍ ഘാര്‍ഗയെയും കണ്ടതിന് ശേഷമാണ് തിരിച്ചുവന്നത്.