അയോധ്യ: തിരുപ്പതി ലഡു വിവാദത്തിന് പിന്നാലെ അയോധ്യ രാമക്ഷേത്രത്തിലെ പ്രസാദത്തിന്റെ സാമ്പിളുകളും പരിശോധനക്കയച്ചു. ക്ഷേത്രത്തില്‍ സ്ഥിരമായി നല്‍കുന്ന ഏലവുമായി ബന്ധപ്പെട്ട് അന്വേഷണം നടത്തണമെന്ന് ആവശ്യമുയര്‍ന്നതിനെ തുടര്‍ന്നാണ് നടപടി. ത്സാന്‍സിയിലുള്ള സര്‍ക്കാര്‍ ലബോറട്ടറിയിലേക്കാണ് പ്രസാദം പരിശോധനക്കയച്ചത്. 

പ്രതിദിനം ഏകദേശം 80,000 പാക്കറ്റോളം പ്രസാദമാണ് ക്ഷേത്രത്തില്‍ വിതരണം ചെയ്യുന്നത്. നേരത്തെ ഉത്തര്‍പ്രദേശ് മുഖ്യമന്ത്രി യോഗി ആദിത്യനാഥിന്റെ സംയോജിത പരാതി പരിഹാര സംവിധാനത്തിലേക്ക് പ്രസാദത്തെക്കുറിച്ച് ചിലര്‍ പരാതി നല്‍കിയിരുന്നു. പ്രസാദം തയ്യാറാക്കുന്ന ഹൈദര്‍ഗഞ്ച് എന്ന പ്രദേശത്ത് നിന്നും ഭക്ഷ്യ സുരക്ഷ വകുപ്പ് സാമ്പിളുകള്‍ ശേഖരിച്ചിട്ടുണ്ട്. ത്സാന്‍സിയിലെ ലാബില്‍ സാമ്പിളുകള്‍ പരിശോധനക്കയച്ചതായി അസിസ്റ്റന്റ് കമ്മീഷണര്‍ (ഫുഡ്) മണിക് ചന്ദ്ര സിങ് സ്ഥിരീകരിച്ചു. 

നേരത്തെ, ക്ഷേത്രങ്ങളിലെ പ്രസാദ നിര്‍മ്മാണം പുറത്ത് കരാര്‍ കൊടുക്കുന്നത് പൂര്‍ണ്ണമായി നിരോധിക്കണമെന്ന് അയോധ്യ രാമക്ഷേത്രത്തിലെ മുഖ്യപൂജാരി ആചാര്യ സത്യേന്ദ്ര ദാസ് പറഞ്ഞിരുന്നു. പൂജാരിമാരുടെ മേല്‍നോട്ടത്തില്‍ മാത്രമേ പ്രസാദം നിര്‍മ്മിക്കാന്‍ പാടുള്ളൂ. അങ്ങനെ നിര്‍മ്മിക്കുന്ന പ്രസാദം മാത്രമേ ഭഗവാന് സമര്‍പ്പിക്കാന്‍ പാടുള്ളൂവെന്ന് വാര്‍ത്ത ഏജന്‍സിയായ പി.ടി.ഐയോട് ആചാര്യ സത്യേന്ദ്ര ദാസ് പറഞ്ഞു.

After Tirupati Ladu Controversy Ayodhya Ram Temples prasadam is also under scrutiny