മലപ്പുറം: നിപ സമ്പർക്കപട്ടികയിൽ ഉൾപ്പെട്ടിരുന്ന കോട്ടക്കൽ സ്വദേശിനി മരിച്ചു. ഇവരുടെ, മൃതദേഹം സംസ്കരിക്കാനുള്ള ബന്ധുക്കളുടെ ശ്രമം തടഞ്ഞ ആരോഗ്യ വകുപ്പ്, നിപ പരിശോധനാ ഫലം ലഭിക്കുന്നതുവരെ മൃതദേഹം സംസ്കരിക്കരുതെന്ന് നിർദേശിച്ചു. മങ്കടയിൽ നിപ ബാധിച്ച് മരിച്ച പെൺകുട്ടിയോടൊപ്പം ഇവരും ആശുപത്രിയിലെ തീവ്രപരിചരണ വിഭാഗത്തിൽ ചികിത്സയിലുണ്ടായിരുന്നു.

മലപ്പുറം ജില്ലയിൽ നിപ സമ്പർക്ക പട്ടികയിൽ 241 പേർ നിരീക്ഷണത്തിലാണ്. ഇതിൽ 12 പേർ ചികിത്സയിൽ കഴിയുന്നു, അവരിൽ അഞ്ചു പേർ ഐസിയുവിലാണ്. സംസ്ഥാനത്താകെ 383 പേർ നിപ സമ്പർക്ക പട്ടികയിൽ ഉൾപ്പെട്ടിട്ടുണ്ട്. മലപ്പുറത്തിനു പുറമേ, പാലക്കാട് ജില്ലയിൽ നിപ സമ്പർക്ക പട്ടികയിൽ 142 പേർ നിരീക്ഷണത്തിലാണ്.

ALSO READ: നിമിഷ പ്രിയയുടെ മോചനം; കേന്ദ്ര ഇടപെടൽ ആവശ്യപ്പെട്ട് പ്രധാനമന്ത്രിക്ക് എംപിമാരുടെ കത്ത്

സമ്പർക്ക പട്ടികയിലുള്ളവരിൽ 94 പേർ കോഴിക്കോട് ജില്ലയിലും, രണ്ടു പേർ എറണാകുളം ജില്ലയിലും നിരീക്ഷണത്തിൽ കഴിയുന്നു. പാലക്കാട് നാലു പേർ ഐസൊലേഷൻ വാർഡിൽ ചികിത്സയിലാണ്. ആരോഗ്യ വകുപ്പ് വീടുകളിൽ സന്ദർശനവും പനി നിരീക്ഷണവും നടത്തിവരുന്നു. ഐസൊലേഷനിലുള്ളവർക്ക് ഫോൺ വഴി മാനസിക പിന്തുണ നൽകുന്നുണ്ട്.

രോഗികളുടെ എണ്ണം വർധിക്കാനുള്ള സാധ്യത കണക്കിലെടുത്ത്, ജില്ലകളിൽ അധിക ഐ.സി.യു, ഐസൊലേഷൻ സൗകര്യങ്ങൾ ഒരുക്കിയിട്ടുണ്ട്.