തിരുവനന്തപുരം: ആരോപണങ്ങളുടെ പശ്ചാത്തലത്തില്‍ സ്വര്‍ണക്കടത്ത് സംഘങ്ങള്‍ക്കെതിരായ പൊലിസ് നടപടികള്‍ നിര്‍ത്തേണ്ടതില്ലെന്നും വിവരം കിട്ടുന്നതിനനുസരിച്ച് പൊലിസ് സ്വര്‍ണക്കടത്ത് പിടികൂടണമെന്നും ഡിജിപി ഷെയ്ക് ദര്‍വേശ് സാഹിബ്. ഇനി മുതല്‍ സ്വര്‍ണക്കടത്ത് കസ്റ്റംസിനെ അറിയിച്ചാല്‍ പോരെയെന്ന എഡിജിപി എംആര്‍ അജിത് കുമാറിന്റെ നിര്‍ദേശത്തെ അതുപോരെന്നും പൊലിസ് പരിശോധനയും സ്വര്‍ണം പിടികൂടൂന്നതും തുടരണമെന്നുമാണ് ഡിജിപി വ്യക്തമാക്കിയത്.

ഉന്നത പൊലിസ് ഉദ്യോഗസ്ഥരുടെ ക്രൈം മീറ്റിംഗിലാണ് നിര്‍ദേശം. സ്വര്‍ണ  കടത്തിന് പിന്നില്‍ മാഫിയയാണെന്നും സ്വര്‍ണക്കടത്ത് പൊലീസ് പിടിച്ചില്ലെങ്കില്‍ അത് മറ്റ് കുറ്റകൃത്യങ്ങള്‍ക്ക്  കാരണമാകുമെന്നും വിവാദങ്ങളെ തുടര്‍ന്ന് പിന്മാറേണ്ടതില്ലെന്നും ഡിജിപി യോഗത്തില്‍ വ്യക്തമാക്കി. ചട്ടങ്ങള്‍ പാലിച്ചാല്‍ ഭയപ്പെടേണ്ടതില്ലെന്നും കിട്ടുന്ന വിവരങ്ങള്‍ അനുസരിച്ച് സ്വര്‍ണം പിടിക്കല്‍ തുടരണമെന്നും ഡിജിപി പറഞ്ഞു. യോഗത്തില്‍ വിശദമായി സംസാരിച്ച അജിത് കുമാര്‍ വിവാദങ്ങള്‍ തന്നെ ബാധിച്ചിട്ടില്ലെന്ന രീതിയിലായിരുന്നു ക്രൈം മീറ്റിംഗില്‍ ഇടപെട്ടത്.

DGP overrides ADGP's instruction to notify customs in gold smuggling cases, ensuring police continue probing without alerting smugglers.