ജീവികണ്ണൂർ: ജീവിതശൈലിസർവേ താൽക്കാലികമായി നിർത്തിവച്ച് ആശാപ്രവർത്തകരുടെ പ്രതിഷേധം. അമിതഭാരമുണ്ടാക്കുമ്പോഴും വേതനമില്ലാത്തതിനാലാണ്  സർവേ നിർത്തിവയ്ക്കുന്നത്. ജീവിതശൈലി രോഗങ്ങളുടെ എണ്ണം വർധിക്കുന്ന സാഹചര്യത്തിലാണ് ആരോഗ്യകുടുംബക്ഷേമ വകുപ്പിന്റെ നേതൃത്വത്തിൽ ഡിജിറ്റൽ സർവേ നടത്തുന്നത്. 
 ഓരോ വീടുകളും കയറിയിറങ്ങി ഡയഗ്‌നോസ്റ്റിക് സർവേയിലൂടെ രോഗ രജിസ്റ്റർ തയാറാക്കണം. 30ന് മുകളിൽ പ്രായമുള്ളവരുടെ വിവരങ്ങളുടെ ഡാറ്റാബേസ് ഉണ്ടാക്കുകയാണ് പ്രാഥമിക ഘട്ടം. 

65 ചോദ്യാവലിയാണ് തയാറാക്കിയത്. ഒരാൾക്ക് അഞ്ചുരൂപയാണ് വേതനം. അഞ്ചുപേരുടെ വിവരങ്ങൾ  അപ്‌ലോഡ് ചെയ്താൽ ലഭിക്കുന്നത്  25 രൂപ. കഴിഞ്ഞ വർഷമാണ് സർവേ ആരംഭിച്ചത്. രണ്ടാംഘട്ട സർവേയാണ് നടക്കുന്നത്. കഴിഞ്ഞ തവണ ഒരാൾക്ക് അഞ്ചുരൂപ നിരക്കിൽ ജോലി പൂർത്തിയാക്കി. എന്നാൽ ഈ വർഷം വർധിപ്പിക്കുമെന്ന് സർക്കാർ പറഞ്ഞെങ്കിലും നടപടി ഉണ്ടായിട്ടില്ല. 

ഒരാൾക്ക് 20 രൂപ നൽകണമെന്നാണ് ആവശ്യം. മൊബൈൽ ആപ്ലിക്കേഷൻ വഴിയാണ് വിവരങ്ങൾ അപലോഡ് ചെയ്യേണ്ടത്. ഒരു ദിവസം 30 പേരുടെ വിവരങ്ങൾ അപ്‌ലോഡ് ചെയ്യണം. ഇതോടെ ഫോൺ പ്രവർത്തനം തടസപ്പെടും. ആറുമാസമാണ് കലാവധിയെങ്കിലും പലയിടത്തും ഒരുമാസത്തിനകം സർവേ പൂർത്തിയാക്കണമെന്നും പറഞ്ഞ് ആശാപ്രവർത്തകരെ ബുദ്ധിമുട്ടിക്കുന്നുണ്ടെന്ന പരാതിയുമുണ്ട്. 

നാലുപേർ ചേർന്ന ടീം വർക്കായാണ് സർവേ പൂർത്തിയാക്കേണ്ടത്. എന്നാൽ നാലുപേരുടെ ജോലിയും ആശാ പ്രവർത്തക ഒറ്റയ്ക്കാണ് ചെയ്യുന്നത്. മറ്റുള്ളവരെല്ലാം തങ്ങളുടെ തലയിലിടുകയാണെന്നും ആശാ പ്രവർത്തകർ പറയുന്നു. 
വേതനക്കാര്യത്തിലും മറ്റും തീരുമാനമാകുന്നതുവരെ സർവേ നിർത്തി വെക്കുകയാണെന്ന് ആശാപ്രവർത്തകരുടെ അസോസിയേഷൻ പ്രതിനിധികളും വ്യക്തമാക്കി.