ഗസ്സ അധിനിവേശത്തിന്റെ ഒന്നാം വാര്‍ഷികദിനത്തിലും കനത്ത ആക്രമണവുമായി ഇസ്‌റാഈല്‍.  ജബലിയഅഭയാര്‍ഥി ക്യാംപിന് നേരെ ഉള്‍പ്പടെ നടത്തിയ ആക്രമണത്തില്‍ 17 പേര്‍ കൊല്ലപ്പെട്ടു. ജബലിയക്ക് പുറമേ വടക്കന്‍ ഗസ്സയില്‍ ഇസ്‌റാഈല്‍ ആക്രമണം കടുപ്പിക്കുകയാണെന്ന റിപ്പോര്‍ട്ടുകളും പുറത്ത് വന്നിട്ടുണ്ട്.

ജബലിയയില്‍ നടന്ന ആക്രമണത്തില്‍ മരിച്ചവരില്‍ ഒമ്പത് പേര്‍ കുട്ടികളാണെന്ന് ഫലസ്തീന്‍ സിവില്‍ ഡിഫന്‍സ് വ്യക്തമാക്കി. പ്രദേശത്ത് ഇസ്‌റാഈല്‍ ശക്തമായി സൈന്യത്തേയും വിന്യസിച്ചിട്ടുണ്ട്. മാസങ്ങള്‍ക്ക് ശേഷമാണ് ഇസ്‌റാഈല്‍ ഇവിടെ സൈനിക വിന്യാസം നടത്തുന്നത്.

രാത്രി നിരവധി തവണ ജബലിയക്ക് നേരെ ആക്രമണമുണ്ടായെന്ന് ഫലസ്തീനിയന്‍ സിവില്‍ ഡിഫന്‍സ് വക്താവ് മഹമുദ് ബാസല്‍ പറഞ്ഞു. മാസങ്ങള്‍ക്കിടയില്‍ ശക്തമായ ആക്രമണമാണ് ജബലിയ നിവാസികള്‍ നേരിടുന്നതെന്നും അദ്ദേഹം കൂട്ടിച്ചേര്‍ത്തു.

വ്യോമാക്രമണത്തിന് പുറമേ ടാങ്കുകള്‍ ഉപയോഗിച്ച് കരയാക്രമണവും ഇസ്‌റാഈല്‍ നടത്തുന്നുണ്ടെന്ന് റോയിട്ടേഴ്‌സ് റിപ്പോര്‍ട്ട് ചെയ്യുന്നു. അതേസമയം, അഭയാര്‍ഥി ക്യാംപിന് നേരെ ആക്രമണം നടത്തിയ വിവരം ഇസ്‌റാഈല്‍ സൈന്യവും സ്ഥിരീകരിച്ചിട്ടുണ്ട്. 

ലബനാനില്‍ ആക്രമണം തുടങ്ങിയ ശേഷം മന്ദഗതിയിലായ ഗസ്സയിലെ കൂട്ടക്കുരുതി വ്യാപിപ്പിക്കാനുള്ള നീക്കത്തിലാണ് ഇസ്‌റാഈലെന്ന് കഴിഞ്ഞ ദിവസം റിപ്പോര്‍ട്ടുണ്ടായിരുന്നു. വടക്കന്‍ ഗസ്സയില്‍ വിവിധ മേഖലകളില്‍ നിന്ന് ജനങ്ങളോട് ഒഴിഞ്ഞു പോകാന്‍ നിര്‍ദേശം നല്‍കിയതായിട്ടായിരുന്നു റിപ്പോര്‍ട്ട്.

വടക്കന്‍ ഗസ്സയിലും ഗസ്സ സിറ്റിയിലും നിന്ന് ആളുകള്‍ ഒഴിഞ്ഞുപോകണമെന്നാണ് സൈന്യം ഇന്നലെ നല്‍കിയ നിര്‍ദേശം. ദാറുല്‍ ബലാഹിലും ഖാന്‍യൂനിസിലും നിലവില്‍ ഒഴിഞ്ഞു പോകാനുള്ള നിര്‍ദേശം നിലനില്‍ക്കുന്നുണ്ട്. മനുഷ്യത്വ ഇടനാഴിയായി പ്രഖ്യാപിച്ച അല്‍ മവാസിയിലടക്കം സുരക്ഷിതമല്ലെന്നും ഇവിടെ ഇടക്കിടെ മിസൈലുകള്‍ വീഴുന്നുണ്ടെന്നും യു.എന്‍ ഉദ്യോഗസ്ഥര്‍ പറയുന്നു. 

വടക്കന്‍ ഗസ്സയിലെ ജബാലിയ അഭയാര്‍ഥി ക്യാംപും ഇസ്‌റാഈല്‍ സൈന്യം വളഞ്ഞിട്ടുണ്ട്. കഴിഞ്ഞദിവസം രാത്രി ജബാലിയയില്‍ ശക്തമായ ആക്രമണം നടന്നുവെന്നും 11 പേര്‍ കൊല്ലപ്പെട്ടതായും സിവില്‍ ഡിഫന്‍സ് വക്താവ് മഹ്്മൂദ് ബാസല്‍ പറഞ്ഞു. ഇസ്‌റാഈല്‍ സേനയുടെ 4,01, 460 ബ്രിഗേഡുകളാണ് നിലവില്‍ ജബാലിയയിലുള്ളത്.