പട്‌ന: വിജയദശമി ആഘോഷത്തിനിടെ പെണ്‍കുട്ടികള്‍ക്ക് വാള്‍ വിതരണം ചെയ്ത് ബി.ജെ.പി എം.എല്‍.എ. ആരെങ്കിലും ദേഹത്ത് മോശമായി സ്പര്‍ശിച്ചാല്‍ അവരുടെ കൈ വെട്ടണം എന്ന് പറഞ്ഞായിരുന്നു എംഎല്‍.എയുടെ നടപടി. ബിഹാറിലെ സിതാമര്‍ഹി ജില്ലയില്‍ ശനിയാഴ്ച നടന്ന പരിപാടിക്കിടെയായിരുന്നു സംഭവം. 

'ഏതെങ്കിലും ദുഷ്ടന്‍ നമ്മുടെ സഹോദരിമാരെ തൊടാന്‍ തുനിഞ്ഞാല്‍, ഈ വാളുകൊണ്ട് അവന്റെ കൈ വെട്ടണം' സീതാമര്‍ഹിയിലെ കപ്രോള്‍ റോഡിലെ പൂജാ പന്തലുകളിലൊന്നില്‍ സമ്മേളനത്തെ അഭിസംബോധന ചെയ്ത് മിഥിലേഷ് കുമാര്‍ പറഞ്ഞു.

'അത്തരക്കാരുടെ കൈകള്‍ വെട്ടാന്‍ നമ്മുടെ സഹോദരിമാരെ പ്രാപ്തരാക്കണം. ആവശ്യമെങ്കില്‍ ഞാനും നിങ്ങളും ഇത് ചെയ്യണം. നമ്മുടെ സഹോദരിമാര്‍ക്കെതിരെ ദുരുദ്ദേശ്യം വച്ചുപുലര്‍ത്തുന്ന എല്ലാ ദുഷ്പ്രവൃത്തിക്കാരെയും നശിപ്പിക്കണം' കുമാര്‍ പറഞ്ഞു.

തന്റെ തീരുമാനത്തെ പിന്തുണയ്ക്കാന്‍ ജനങ്ങളോട് അഭ്യര്‍ഥിച്ച സീതാമര്‍ഹി ബി.ജെ.പി എം.എല്‍.എ, തിന്മകള്‍ക്കെതിരെ പ്രവര്‍ത്തിക്കാന്‍ ആളുകളെ, പ്രത്യേകിച്ച് സ്ത്രീകളോട് ആവശ്യപ്പെടുകയും ചെയ്തു. സ്‌കൂള്‍, കോളജ് വിദ്യാര്‍ഥികള്‍ക്കാണ് വാളുകള്‍ വിതരണം ചെയ്തത്.

നവരാത്രി ആഘോഷത്തിന്റെ ഭാഗമായി നിരവധി ദുര്‍ഗാപൂജ പന്തലുകള്‍ സന്ദര്‍ശിക്കുകയും വാളുകള്‍ വിതരണം ചെയ്ത ചെയ്ത മിഥിലേഷ് കുമാര്‍, നിരവധി തോക്കുകളും വാളുകളും മറ്റ് ആയുധങ്ങളും വേദിയില്‍ പ്രദര്‍ശിപ്പിക്കുകയും ചെയ്തു.