ന്യൂഡൽഹി: കനത്ത പുകമഞ്ഞാൽ പൊതിഞ്ഞ പുലരിയാണ് ദീപാവലി നാളിൽ ഡൽഹിക്കാരെ വരവേറ്റത്.  ഇന്ന് (വ്യാഴം)  പുലർച്ചെ ഡൽഹിയിൽ എല്ലായിടത്തും വായു വളരെ മോശം അവസ്ഥയിൽ എത്തിയെന്നും നഗരത്തിനു​മേൽ പുകമഞ്ഞി​ൻറെ കട്ടിയുള്ള പാളി കാണപ്പെട്ടുവെന്നും വാർത്താ ഏജൻസിയായ പി.ടി.ഐ റിപ്പോർട്ട് ചെയ്തു. നഗരത്തിലുടനീളം വായു ‘വളരെ മോശം’ വിഭാഗത്തിലാണെന്ന് മുപ്പത്തിയെട്ട് മോണിറ്ററിംഗ് സ്റ്റേഷനുകൾ കാണിച്ചു. രാവിലെ 9 മണിക്ക് ശരാശരി വായു ഗുണനിലവാര സൂചിക 330ലെത്തി. ബുധനാഴ്ചത്തെ ഇത് 307 ആയിരുന്നു. ദീപാവലി ആഘോഷങ്ങൾ ആരംഭിച്ച് വൈകുന്നേരത്തോടെ കൂടുതൽ മോശമായേക്കുമെന്നും റിപ്പോർട്ട് പറയുന്നു.

പൂജ്യത്തിനും 50 നും ഇടയിലുള്ളത് നല്ലത്, 51-100 തൃപ്‌തികരം, 101-200 മിതമായത്, 201-300 മോശം, 301-400 വളരെ മോശം, 401-450 ഗുരുതരം എന്നിങ്ങനെയാണ് വായു ഗുണനിലവാര സൂചികയിൽ ചിട്ടപ്പെടുത്തിയിരിക്കുന്നത്. 

ഈ വർഷം ഡൽഹിയുടെ അന്തരീക്ഷ മലിനീകരണ തോത് അധികരിച്ചതായാണ് സൂചിക കാണിക്കുന്നത്. ഇത്തവണ മലിനീകരണത്തി​​ൻറെ കാഠിന്യം ലഘൂകരിക്കാൻ പടക്കങ്ങളുടെ നിർമാണം, സംഭരണം, വിൽപന, ഉപയോഗം എന്നിവക്ക് സമഗ്രമായ നിരോധനം ഈ മാസം ആദ്യം ഡൽഹി സർക്കാർ പ്രഖ്യാപിച്ചിരുന്നു.