കണ്ണൂർ: അടവുനയത്തിന്റെ ഭാഗമായി കേരളം ഒഴികെയുള്ള സംസ്ഥാനങ്ങളിൽ കോൺഗ്രസുമായി കൂട്ടുചേർന്നതിൽ തെറ്റില്ലെന്ന് സി.പി.എം. ഹിന്ദുത്വ രാഷ്ട്രീയത്തിന്റെ വളർച്ച തടയാനും ഏകകക്ഷി ഭരണമെന്ന ബി.ജെ.പി അജൻഡ പൊളിക്കാനും ഇൻഡ്യാ സഖ്യത്തിനു കഴിഞ്ഞെന്നും സി.പി.എം കേന്ദ്ര കമ്മിറ്റി വിലയിരുത്തി. 24ാം പാർട്ടി കോൺഗ്രസിനുവേണ്ടി കേന്ദ്ര കമ്മിറ്റി തയാറാക്കിയ കരട് രാഷ്ട്രീയ അവലോകന റിപ്പോർട്ടിലാണ് ഇക്കാര്യങ്ങളുള്ളത്. 

രാഷ്ട്രീയ അടവുനയം സി.പി.എമ്മിനേക്കാൾ കോൺഗ്രസിനാണ് ഗുണംചെയ്തതെന്നും റിപ്പോർട്ട് പറയുന്നു. ഇൻഡ്യാ സഖ്യത്തിന്റെ ഭാഗമായിരിക്കുമ്പോൾ തന്നെ കോൺഗ്രസിന്റെ സാമ്പത്തിക നയങ്ങളെയും മൃദുഹിന്ദുത്വ നിലപാടുകളെയും എതിർക്കണം. പാർട്ടിയുടെ ബഹുജന അടിത്തറയിലും സ്വാധീനത്തിലും ഇടിവുണ്ടായതായും കേരളത്തിലെ വോട്ടുചോർച്ച ഗുരുതരമെന്നും ഇക്കാര്യങ്ങൾ ആഴത്തിൽ പരിശോധിക്കണമെന്നും റിപ്പോർട്ടിലുണ്ട്. കേരളത്തിൽ ബി.ജെ.പി സ്വാധീനം വർധിച്ചെന്നും ക്ഷേത്രങ്ങൾ വഴിയുള്ള ഹിന്ദുത്വശക്തികളുടെ കടന്നുകയറ്റം ചെറുക്കണമെന്നും റിപ്പോർട്ടിലുണ്ട്.

സംഘടനാപരമായി അടവുനയം കൊണ്ട് നേട്ടമുണ്ടാക്കാൻ സി.പി.എമ്മിന് കഴിഞ്ഞില്ല. ആ ദൗർബല്യം തിരിച്ചറിഞ്ഞ് തിരുത്തൽ നടപടികൾ ആവിഷ്‌കരിക്കണം. അതിനു മുന്നോടിയായി അടവുനയ അവലോകനരേഖ ഇത്തവണ കീഴ്ഘടകങ്ങളിൽ കൂടി ചർച്ച ചെയ്യും. പ്രാദേശിക ഘടകങ്ങളിൽനിന്ന് ഉരുത്തിരിയുന്ന നിർദേശങ്ങൾകൂടി ക്രോഡീകരിച്ചാവും പാർട്ടി കോൺഗ്രസിൽ അവലോകനരേഖ അവതരിപ്പിക്കുക.

ആദ്യമായാണ് ഇത്തരത്തിൽ അടവുനയ അവലോകന രേഖ ബ്രാഞ്ചുതലങ്ങളിൽകൂടി ചർച്ചയ്ക്കു വരുന്നത്. പാർട്ടി കോൺഗ്രസിന് മുമ്പ് രാഷ്ട്രീയപ്രമേയ കരട് തയാറാക്കി കീഴ്ഘടകങ്ങൾക്കു നൽകുകയും അതിന്മേൽ ചർച്ച നടക്കാറുമുണ്ട്. ജനുവരിയോടെ രാഷ്ട്രീയപ്രമേയ കരട് തയാറാകുമെന്നറിയുന്നു. 2025 ഏപ്രിൽ രണ്ടുമുതൽ ആറുവരെ തമിഴ്‌നാട്ടിലെ മധുരയിലാണ് പാർട്ടി കോൺഗ്രസ്. അതേസമയം, പാർട്ടി നയംമാറ്റുന്നുവെന്ന വാർത്തകൾ സി.പി.എം നേതൃത്വം തള്ളി. 
രാഷ്ട്രീയപ്രമേയം ജനുവരിയിലാണ് ചർച്ച ചെയ്യുകയെന്ന് പ്രകാശ് കാരാട്ട് പ്രതികരിച്ചു.