കൊച്ചി: ഐഎസ്എല്ലില്‍തുടർ തോൽവികളിൽ നിന്ന് കരകയറാതെ ബ്ലാസ്റ്റേഴ്സ്.ഹൈദരാബാദിനെതിരെ സീസണിലെ തുടർച്ചയായ മൂന്നാം തോല്‍വി വഴങ്ങിയിരിക്കുകയാണ്. കൊച്ചി കലൂര്‍ ജവഹര്‍ലാല്‍ നെഹ്റു രാജ്യാന്തര സ്റ്റേഡിയത്തില്‍ നടന്ന മത്സരത്തില്‍ ഹൈദരാബാദ് എഫ്‍സി മഞ്ഞപ്പടയെ ഒന്നിനെതിരെ രണ്ട് ഗോളുകൾക്കാണ് പരാജയപ്പെടുത്തിയത്.സ്വന്തം മണ്ണിലും വി‍ജയം നേടാതെ ബ്ലാസ്റ്റേഴ്സിന്‍റെ ആരാധകരെ നിരാശപ്പെടുത്തുകയാണ്. മത്സരത്തില്‍ ആദ്യ ഗോൾ 13-ാം മിനിറ്റില്‍ ജീസസ് ഗിമിനസിലൂടെ  ബ്ലാസ്റ്റേഴ്സ് സ്വന്തമാക്കി ​ഗംഭീര തുടമായിരുന്നു എന്നാൽ  43-ാം മിനിറ്റില്‍ ആൻഡ്രെ ആല്‍ബയിലൂടെ ഹൈദരാബാദ് തിരിച്ചടിച്ചു. രണ്ടാം പകുതിയില്‍ ഇരു ടീമുകളും മുന്നിലെത്താനുള്ള ശ്രമങ്ങൾ തുടരുന്നതിനിടെ ഗാലറിയെ നിശബ്‍ദമാക്കി ഹൈദരാബാദിന് അനുകൂലമായ വിവാദ പെനാല്‍റ്റി വിധിക്കപ്പെട്ടു. 70-ാം മിനിറ്റില്‍ ലഭിച്ച പെനാല്‍റ്റി ആല്‍ബ തന്നെയാണ് ലക്ഷ്യത്തിലെത്തിച്ചു ഹൈദരാബാദ് ലീഡ് ഉയർത്തി. സമനില ഗോളിനായി എല്ലാം മറന്നുള്ള ആക്രമണമാണ് പിന്നീട് ബ്ലാസ്റ്റേഴ്സ് കളത്തിൽ നടത്തിയത്.

ഇതിനിടെ മഞ്ഞപ്പടയുടെ പ്രതിരോധ നിരയുടെ പാളിച്ചകൾ ഹൈദരാബാദിന് മുതലെടുക്കാൻ കഴിയാതിരുന്നതാണ് സ്കോർ 2-1 നിന്നത്. മത്സരത്തിലുടനീളം ബോൾ പൊസിഷനിലും പാസിംഗിലും അടക്കം മുന്നിട്ട് നിന്നെങ്കിലും സ്കോര്‍ ചെയ്യാൻ മാത്രം ബ്ലാസ്റ്റേഴ്സിന് കഴിഞ്ഞില്ല. സീസണില്‍ എട്ട് മത്സരങ്ങൾ പൂര്‍ത്തിയായപ്പോൾ രണ്ട് വിജയങ്ങൾ മാത്രം പേരിലുള്ള മഞ്ഞപ്പട 10-ാം സ്ഥാനത്താണ്.