ന്യൂഡല്‍ഹി: പഞ്ചാബില്‍ നിന്നുള്ള കര്‍ഷകരുടെ ദില്ലി ചലോ മാര്‍ച്ചിന് ഇന്ന് തുടക്കം. സംയുക്ത കിസാന്‍ മോര്‍ച്ച, കിസാന്‍ മസ്ദൂര്‍ മോര്‍ച്ച എന്നീ സംഘടനകളുടെ നേതൃത്വത്തിലാണ് ജാഥ്. 101 കര്‍ഷകരാണ് കാല്‍നടയായി ഡല്‍ഹിയിലെത്തുക. മിനിമം താങ്ങുവില ഏര്‍പ്പെടുത്തുക, കാര്‍ഷിക കടങ്ങള്‍ എഴുതിത്തള്ളുക തുടങ്ങിയ ആവശ്യങ്ങള്‍ മുന്‍നിര്‍ത്തിയാണ് മാര്‍ച്ച്.

പഞ്ചാബ്- ഹരിയാന അതിര്‍ത്തിയായ ശംഭുവില്‍ നിന്ന് ഇന്ന് ഉച്ചയ്ക്ക് ഒരു മണിയോടെയാണ് മാര്‍ച്ച് ആരംഭിക്കുകയെന്ന് സംയുക്ത കിസാന്‍ മോര്‍ച്ച നേതാവ് സര്‍വാന്‍ സിങ് പാന്ധേര്‍ അറിയിച്ചു. സമാധാനപരമായാണ് ജാഥ നടക്കുക. സമരത്തെ എങ്ങനെ നേരിടണമെന്നു സര്‍ക്കാരിനു തീരുമാനിക്കാമെന്നും സര്‍വാന്‍ സിങ് പാന്ധേര്‍ വ്യക്തമാക്കി.

അതേസമയം മാര്‍ച്ചിന് ഹരിയാന സര്‍ക്കാര്‍ അനുമതി നല്‍കിയിട്ടില്ല. കര്‍ഷക റാലി മുന്‍നിര്‍ത്തി ഹരിയാന അംബാലയില്‍ ബി.എന്‍.എസ്.എസ് 163 പ്രഖ്യാപിച്ചു. പഞ്ചാബ്-ഹരിയാന അതിര്‍ത്തിയില്‍ ബാരിക്കേഡ് സ്ഥാപിക്കുകയും അര്‍ദ്ധ സൈനിക വിഭാഗത്തെ വിന്യസിക്കുകയും ചെയ്തിട്ടുണ്ട്. 

ഏതു സാഹചര്യത്തെയും നേരിടാന്‍ തയാറാണെന്ന് പൊലിസ് അറിയിച്ചു. ഡല്‍ഹി പൊലിസിന്റെ അനുമതിയില്ലാതെ മാര്‍ച്ച് നടത്തരുതെന്ന് ഹരിയാന സര്‍ക്കാര്‍ കര്‍ഷക സംഘടനകളോട് അഭ്യര്‍ഥിക്കുകയും ചെയ്തിട്ടുണ്ട്.