ദുബൈ: ലൈവ് വീഡിയോയില്‍ ലഹരി മരുന്ന് ഉപയോഗിച്ചതിന് മലയാളി വ്‌ളോഗര്‍ അബ്ദുല്‍ ഹക്കീം യുഎഇയില്‍ പിടിയില്‍. സമൂഹമാധ്യമങ്ങളില്‍ മനുഷ്യാവകാശ പ്രവര്‍ത്തകനായി ചമയുന്ന ഇയാളുടെ എന്റെ കാസെറ്റ് എന്ന പേജിന് നിരവധി കാഴ്ച്ചക്കാരുണ്ട്. കേരളത്തിലും ഇയാള്‍ക്കെതിരെ നിരവധി കേസുകള്‍ നിലവിലുണ്ട്. 

യുഎഇയില്‍ വെച്ച് ലഹരി മരുന്ന് ഉപയോഗിക്കുന്നതിനിടെ സമൂഹമാധ്യമ പ്ലാറ്റ്‌ഫോമായ 'കിക്കി'ല്‍ അറിയാതെ ലൈവ് സ്ട്രീമിങ് ഓണ്‍ ആവുകയായിരുന്നു. ഇതോടെയാണ് ഹക്കീമിന്റെ യഥാര്‍ഥ മുഖം ലോകമറിഞ്ഞത്. ലൈവ് വീഡിയോ സമൂഹമാധ്യമങ്ങളില്‍ വൈറലായതോടെ ഹക്കീമിനെതിരെ പരാതി ഉയര്‍ന്നു. യുഎഇയില്‍ നിന്ന് പുറത്ത് കടക്കാന്‍ ശ്രമിക്കുന്നതിനിടെ ഷാര്‍ജ പൊലിസ് ഹക്കീമിനെ അറസ്റ്റ് ചെയതെന്നാണ് വിവരം. 

ലഹരിമാഫിയക്കെതിരെ ഹക്കീം പോസ്റ്റ് ചെയ്യുന്ന വീഡിയോകള്‍ ഇതിനോടകം ഹിറ്റാണ്. ബെംഗളുരുവില്‍ മലയാളികളെ കുടുക്കുന്ന ലഹരിമാഫിയ സംഘത്തിന്റെ വീഡിയോ ആണ് ഹക്കീമിനെ സമൂഹമാധ്യമത്തില്‍ പ്രശസ്തനാക്കിയത്. സ്വയം ലഹരി വിരുദ്ധ പ്രവര്‍ത്തകനായി ചമയുന്ന ഇയാള്‍ക്ക് ലഹരി സംഘങ്ങളുമായി അടുത്ത ബന്ധമുണ്ടെന്ന് നേരത്തെ ആരോപണം ഉയര്‍ന്നിരുന്നു. ഇതുമായി ബന്ധപ്പെട്ട് കേരളത്തിലും കേസുകള്‍ രജിസ്റ്റര്‍ ചെയ്തിട്ടുണ്ട്. 

ഭര്‍ത്താവിനെ കത്തിമുനയില്‍ നിര്‍ത്തി ഭാര്യയുമായി സെല്‍ഫിയെടുക്കാന്‍ ശ്രമിച്ചു, കസ്റ്റഡിയിലെടുക്കവെ പൊലിസ് ജീപ്പ് ആക്രമിച്ചതിനും ഇയാള്‍ക്കെതിരെ കേസെടുത്തിരുന്നു. സോഷ്യല്‍ മീഡിയ പേജ് ഉപയോഗിച്ച് സിനിമ താരങ്ങളെയടക്കം ബ്ലാക്‌മെയില്‍ ചെയ്ത് പണം തട്ടിയതായും ഇയാള്‍ക്കെതിരെ ആരോപണമുണ്ട്.