പത്തനംതിട്ട:  സഹപാഠികള്‍ ചേര്‍ന്ന് പീഡിപ്പിച്ചെന്ന പതിമൂന്ന് വയസ്സുകാരിയുടെ പരാതി വ്യാജമെന്ന് പൊലിസ്. പീഡനം നടന്നിട്ടില്ലെന്ന വൈദ്യ പരിശോധനാ ഫലം ലഭിച്ചിരുന്നു. ഇതിന് പിന്നാലെ പൊലിസ് നടത്തിയ സമഗ്രമായ അന്വേഷണത്തിലാണ് പരാതി വ്യാജമാണെന്ന് വ്യക്തമായത്. പെണ്‍കുട്ടിയുടെ മൊഴിയിലും സാഹചര്യങ്ങളിലും പൊരുത്തക്കേട് കണ്ടതിനെ തുടര്‍ന്ന് കസ്റ്റഡിയിലെടുത്ത 6 പേരെ പൊലിസ് ഇന്നലെ തന്നെ താല്‍ക്കാലികമായി വിട്ടയച്ചിരുന്നു. 

വൈദ്യ പരിശോധനാ ഫലം ലഭിച്ചതിനു ശേഷം പൊലിസ് നടത്തിയ ചോദ്യം ചെയ്യലില്‍ സഹപാഠികള്‍ പീഡിപ്പിച്ചിട്ടില്ലെന്ന് പെണ്‍കുട്ടി മൊഴി മാറ്റിയിരുന്നു. കുട്ടികള്‍ തമ്മിലുണ്ടായ തര്‍ക്കമാണോ ഇത്തരം ഒരു പരാതിക്ക് കാരണമായതെന്ന അന്വേഷണത്തിലാണ് ഇപ്പോള്‍ പൊലിസ്. കാമുകനുമായി ബ്രേക്ക്അപ്പ് ആയതിനെ തുടര്‍ന്നാണ് പെണ്‍കുട്ടി ഇത്തരത്തില്‍ വ്യാജപരാതി ഉന്നയിക്കാന്‍ കാരണമായതെന്നും പൊലിസ് സംശയിക്കുന്നുണ്ട്. 

ALSO READ: പത്തനംതിട്ടയില്‍ സഹപാഠികള്‍ പീഡിപ്പിച്ചെന്ന പതിമൂന്നുകാരിയുടെ മൊഴിയില്‍ വൈരുധ്യം; കേസില്‍ നിര്‍ണായക വഴിത്തിരിവ്

സ്‌കൂളില്‍വച്ചുനടന്ന കൗണ്‍സലിങ്ങിനിടെയാണ് കുട്ടി പീഡന വിവരം പറയുന്നത്. പത്തിലധികം പേര്‍ തന്നെ പീഡിപ്പിച്ചുവെന്നും ഇതില്‍ ആറ് പേര്‍ സഹപാഠികളാണെന്നുമായിരുന്നു പെണ്‍കുട്ടിയുടെ മൊഴി.  തുടര്‍ന്ന് പ്രായപൂര്‍ത്തിയാകാത്തവര്‍ ഉള്‍പ്പെടെ ആറുപേരെ കേസില്‍ പൊലിസ് കസ്റ്റഡിയിലെടുത്തു. കൂടല്‍ പൊലിസ് സംഭവവുമായി ബന്ധപ്പെട്ട് രണ്ട് എഫ്.ഐ.ആര്‍ രജിസ്റ്റര്‍ ചെയ്യുകയും ചെയ്തിരുന്നു. 

സ്‌കൂളിന് സമീപത്ത് വച്ചും കുറ്റാരോപിതരില്‍ ഒരാളായ പെണ്‍കുട്ടിയുടെ വീട്ടില്‍ വച്ചുമായിരുന്നു പീഡനമെന്നാണ് പെണ്‍കുട്ടി മൊഴി നല്‍കിയിരുന്നത്. എന്നാല്‍  കൃത്യം നടന്നെന്ന് ആരോപിക്കപ്പെടുന്ന സമയത്ത്, കസ്റ്റഡിയില്‍ എടുത്തവര്‍ ഒരുമിച്ചുണ്ടായിരുന്നില്ലെന്ന് പൊലിസ് നടത്തിയ അന്വേഷണത്തില്‍ കണ്ടെത്തി.

സംഭവത്തില്‍ ബാലാവകാശ സംരക്ഷണ കമ്മിഷന്‍ ചെയര്‍പഴ്‌സന്‍ കെ.വി മനോജ് കുമാര്‍ സ്വമേധയാ കേസെടുത്തിരുന്നു. മാധ്യമ വാര്‍ത്തകളുടെ അടിസ്ഥാനത്തിലായിരുന്നു കമ്മിഷന്റെ നടപടി.  

police say a 13-year-old girl's assault complaint in pathanamthitta was found to be false after medical examination and detailed investigation. six detained minors were released as the probe continues.