ന്യൂഡല്‍ഹി: മുന്‍ പ്രധാനമന്ത്രി മന്‍മോഹന്‍ സിങിന് ആദരവോടെ വിട നല്‍കി രാജ്യം. നിഗംബോധ് ഘട്ടില്‍ പൂര്‍ണ ഔദ്യോഗിക ബഹുമതികളോടെ സംസ്‌കാരം നടന്നു. രാഷ്ട്രപത് ദ്രൗപദി മുര്‍മുവും പ്രധാനമന്ത്രി മോദിയും മന്‍മോഹന്‍സിങിന് അന്തിമോപചാരമര്‍പ്പിച്ചു. ആഭ്യന്തര മന്ത്രി അമിത് ഷാ, കോണ്‍ഗ്രസ് നേതാവ് രാഹുല്‍ഗാന്ധി എന്നിവരടക്കം നിരവധി പ്രമുഖര്‍ പങ്കെടുത്തു. 

സൈനിക ബഹുമതികളോടെ, സിഖ് മതാചാരപ്രകാരമായിരുന്നു സംസ്‌കാരച്ചടങ്ങുകള്‍. അന്ത്യാഞ്ജലി അര്‍പ്പിക്കാന്‍ ആയിരക്കണക്കിന് പ്രവര്‍ത്തകരാണെത്തിയത്. രാവിലെ എ.ഐ.സി.സി ആസ്ഥാനത്ത പൊതുദര്‍ശനത്തിന് ശേഷം വിലാപയാത്രയായിട്ടാണ് സംസ്‌കാരം നടക്കുന്ന യമുനാ തീരത്തെ നിഗംബോധ് ഘട്ടിലേക്ക് മൃതദേഹം കൊണ്ടുപോയത്. രാജ്യത്ത് ഏഴുദിവസത്തെ ദുഃഖാചരണം പ്രഖ്യാപിച്ചിട്ടുണ്ട്. 

സാമ്പത്തിക വിദഗ്ധന്‍കൂടിയായ ഡോ. മന്‍മോഹന്‍ സിങ് വ്യാഴാഴ്ച രാത്രി 10 മണിയോടെയാണ് മരിച്ചത്. 2004 മുതല്‍ 2014 വരെ പ്രധാനമന്ത്രിയായിരുന്ന അദ്ദേഹം വ്യാഴാഴ്ച വൈകിട്ട് എട്ടുമണിയോടെയാണ് വസതിയില്‍ കുഴഞ്ഞുവീണത്. അവശനിലയിലായ അദ്ദേഹത്തെ ഡല്‍ഹി എയിംസില്‍ പ്രവേശിപ്പിച്ചെങ്കിലും ജീവന്‍ രക്ഷിക്കാനായില്ല.