തിരുവനന്തപുരം: സ്റ്റുഡന്റ് പൊലിസ് കേഡറ്റ് പദ്ധതിയോട് മുഖംതിരിച്ച് സർക്കാർ. കേഡറ്റുകളെ പരിശീലിപ്പിക്കുന്ന അധ്യാപകർക്കും പൊലിസുകാർക്കും പ്രതിഫലം മുടങ്ങിയിട്ട് രണ്ടുവർഷമായി. പണമില്ലാത്തതിനാൽ പരിശീലകർ പലരും സ്‌കൂളുകളിലേക്ക് പോകാറില്ല. ഇതേത്തുടർന്ന് മുഖ്യമന്ത്രി ഉന്നതതല യോഗം വിളിച്ചു. നാളെയാണ് യോഗം. 
വിദ്യാഭ്യാസ,  ആഭ്യന്തര, തദ്ദേശ വകുപ്പുകളുടെ യോഗമാണ് വിളിച്ചത്. ഈ അധ്യയനവർഷം പദ്ധതിക്കായി 10 കോടി രൂപ വകയിരുത്തിയെങ്കിലും ഒറ്റ പൈസ പോലും ലഭിച്ചില്ല. ഓണാവധിക്കാലത്ത് ചില സ്‌കൂളുകളിൽ അധ്യാപകർ സ്വന്തം ചെലവിൽ ക്യാംപുകൾ നടത്തിയിരുന്നെങ്കിലും ക്രിസ്മസ് അവധിക്കാലത്ത് പൂർണമായും തടസപ്പെട്ടു. 

ക്യാംപിന് പണം ആവശ്യപ്പെട്ട സ്‌കൂളുകളോട് സ്വന്തം ചെലവിൽ നടത്തിക്കോളൂവെന്ന് പൊതുവിദ്യാഭ്യാസ വകുപ്പ് വ്യക്തമാക്കിയതോടെയാണ്  പൂർണമായും തടസപ്പെട്ടത്.  വിരമിച്ച പൊലിസുകാരാണ് പല സ്‌കൂളുകളിലും പരിശീലനം നൽകുന്നത്. പണമില്ലാതെ വഴിമുട്ടിനിൽക്കുമ്പോഴും എസ്.പി.സിക്കായി പിടിവലിയും രാഷ്ട്രീയസമ്മർദവും തുടരുന്നുണ്ട്. 70 സ്‌കൂളുകളിൽ പുതുതായി പദ്ധതിക്ക് അനുമതിനൽകി. ഒരു പഞ്ചായത്തിലെ തന്നെ നിരവധി സ്‌കൂളുകളിൽ പദ്ധതിയുണ്ട്. 

അതേസമയം, എസ്.പി.സി സംസ്ഥാനത്തിന്റെ അഭിമാനപദ്ധതി തന്നെയെന്ന് മന്ത്രി വി. ശിവൻകുട്ടി പറഞ്ഞു. പൊതുവിലുണ്ടായ സാമ്പത്തിക പ്രതിസന്ധി എസ്.പി.സിയെയും ബാധിച്ചു. സാമ്പത്തിക പ്രതിസന്ധി കാരണം പല വകുപ്പുകളിലെയും ഫണ്ട് വെട്ടിക്കുറച്ചു. 35 കോടി രൂപ പലഘട്ടങ്ങളിലായി കൊടുത്തിട്ടുണ്ട്. ഇത്തവണ സമയത്തിന് കൊടുക്കാനായില്ല. 15 കോടി രൂപ ധനവകുപ്പ് വൈകാതെ അനുവദിക്കും. അധ്യാപകർക്കുണ്ടായ ബാധ്യത പരിഹരിക്കുമെന്നും അദ്ദേഹം അറിയിച്ചു.

പദ്ധതി 1,040 സ്‌കൂളുകളിൽ
സംസ്ഥാനത്തെ 1,040 സ്‌കൂളുകളിലാണ് നിലവിൽ പദ്ധതിയുള്ളത്. ഹൈസ്‌കൂളിലാണ് പദ്ധതി നടപ്പാക്കുന്നത്. മൂന്നു ലക്ഷം രൂപ കെട്ടിവച്ചാൽ മാത്രമേ എയ്ഡഡ് സ്‌കൂളുകൾക്ക് പദ്ധതി ലഭിക്കുകയുള്ളൂ. ആഴ്ചയിൽ ആറുമണിക്കൂറാണ് പരിശീലനം. പി.ടി, കാക്കി യൂനിഫോമിനായി ഒരു കുട്ടിക്ക് 2,000 രൂപ അലവൻസ് നൽകണം. പരിശീലന ദിവസങ്ങളിൽ ഒരു കുട്ടിക്ക് എട്ടര രൂപ വീതം ഭക്ഷണത്തിനും നൽകണം. ഓണത്തിനും ക്രിസ്മസിനും അവധിക്കാലത്ത് മൂന്ന് മുതൽ അഞ്ചു ദിവസം വരെ ക്യാംപും സംഘടിപ്പിക്കണം. യൂനിഫോമിനായി മാത്രം ഒരു സ്‌കൂളിന് 88,000 രുപ ചെലവുവരും.