കൊച്ചി: റോഡ് കെട്ടിയടച്ച് പാര്‍ട്ടി സമ്മേളനം നടത്തിയ സംഭവങ്ങളില്‍ സി.പി.എം സംസ്ഥാന സെക്രട്ടറി എം.വി ഗോവിന്ദന്‍, സി.പി.ഐ സംസ്ഥാന സെക്രട്ടറി ബിനോയ് വിശ്വം അടക്കം നേതാക്കളോട് നേരിട്ട് ഹാജരാകാന്‍ നിര്‍ദ്ദേശിച്ച് ഹൈക്കോടതി. തിരുവനന്തപുരം വഞ്ചിയൂര്‍, സെക്രട്ടറിയേറ്റ്, കൊച്ചി കോര്‍പറേഷന്‍ എന്നിവിടങ്ങളില്‍ റോഡ് തടസ്സപ്പെടുത്തിയും നടപ്പാതയില്‍ സ്റ്റേജ് കെട്ടിയതുമുള്‍പ്പെടെയുള്ള വിഷയങ്ങളില്‍ എടുത്ത കോടതിയലക്ഷ്യ കേസുകളിലാണ് നിര്‍ദ്ദേശം. ഫെബ്രുവരി 10 ന് ഹാജരാകാനാണ് നിര്‍ദ്ദേശം നല്‍കിയിരിക്കുന്നത്.

 വഞ്ചിയൂരില്‍ സിപിഎം ഏരിയാ സമ്മേളനം നടത്തിയ സംഭവത്തില്‍ എംവി ഗോവിന്ദന്‍, കടകംപള്ളി സുരേന്ദ്രന്‍, എം വിജയകുമാര്‍, വികെ പ്രശാന്ത് അടക്കമുള്ള നേതാക്കള്‍ ഹാജരാകണം. 

അതേസമയം, കൊച്ചി കോര്‍പ്പറേഷന് മുന്നില്‍ ഡി.സി.സി നടത്തിയ സമരവുമായി ബന്ധപ്പെട്ട് ഡി.സി.സി പ്രസിഡന്റ് മുഹമ്മദ് ഷിയാസിനോടും ടിജെ വിനോദ് എം.എല്‍.എയോടും അന്നേ ദിവസം ഹാജരാകാന്‍ കോടതി ഉത്തരവിട്ടിട്ടുണ്ട്. 

വിഷയം ചെറുതായി കാണാനാകില്ലെന്ന് കോടതി വ്യക്തമാക്കി. വഞ്ചിയൂരിലേത് പ്രതിഷേധത്തിന്റെ ഭാഗം പോലുമായിരുന്നില്ല. സാധാരണ ഓഡിറ്റോറിയത്തിൽ നടത്തുന്ന പരിപാടിയായിരുന്നു. എല്ലാ ദിവസവും ഇത്തരം സംഭവങ്ങൾ ആവർത്തിക്കപ്പെടുകയാണെന്നും കോടതി ചൂണ്ടിക്കാട്ടി.