കുവൈത്ത് സിറ്റി: ​ഗതാ​ഗത നിയമലംഘനങ്ങൾ കണ്ടെത്താനായുള്ള എഐ കാമറകൾ 2024 ഡിസംബറിൽ 15 ദിവസത്തിനുള്ളിൽ ആകെ 18,778 നിയമലംഘനങ്ങൾ പകർത്തിയതായി കുവൈത്ത് ജനറൽ ട്രാഫിക് ഡിപ്പാർട്ട്മെന്റ്റിലെ ട്രാഫിക് അവയർനെസ് അസിസ്റ്റന്റ്റ് ഡയറക്ടർ ലെഫ്റ്റനന്റ് കേണൽ അബ്‌ദുല്ല ബു ഹസ്സൻ വ്യക്തമാക്കി. ഡ്രൈവറുടെയും മുൻ സീറ്റ് യാത്രക്കാരൻ്റെയും സീറ്റ് ബെൽറ്റ് ലംഘനങ്ങൾ പുതുതായി സ്ഥാപിച്ച കാമറകൾക്ക് നിരീക്ഷിക്കാൻ കഴിയുമെന്നും ഇത്തരം ഇത്തരം നിയമലംഘനങ്ങൾ കണ്ടെത്തിയാൽ വാഹന ഉടമയ്ക്കെതിരെ കുറ്റപത്രം രേഖപ്പെടുത്തുമെന്നും അദ്ദേഹം വാർത്താക്കുറിപ്പിൽ സ്ഥിരീകരിച്ചു.

ഡിസംബറിൽ 15 ദിവസത്തിനിടെ രേഖപ്പെടുത്തിയ ​ഗതാ​ഗത ലംഘനങ്ങളിൽ 4,944 എണ്ണം വാഹനമോടിക്കുമ്പോഴുള്ള മൊബൈൽ ഫോൺ ഉപയോഗവുമായി ബന്ധപ്പെട്ടതാണ്. അതേസമയം, 2024 ൽ ഗതാഗത സംബന്ധമായ മരണങ്ങളിൽ കുറവുണ്ടായതായി അബ്‌ദുല്ല ബു ഹസ്സൻ ചൂണ്ടിക്കാട്ടി. 2023ൽ 296 അപകട മരണങ്ങളുണ്ടായപ്പോൾ 2024ൽ 284 മരണങ്ങളാണ് റിപ്പോർട്ട് ചെയ്തത്. വാഹനങ്ങളുടെയും റോഡുകളുടെയും ഡ്രൈവിംഗ് ലൈസൻസുകളുടെയും എണ്ണം വർധിച്ചിട്ടും അപകട മരണങ്ങളിൽ 12 കേസുകളുടെ കുറവുണ്ടായെന്ന് അദ്ദേഹം ചൂണ്ടിക്കാട്ടി. ട്രാഫിക് അഫയേഴ്സ് അസിസ്റ്റന്റ് അണ്ടർസെക്രട്ടറി മേജർ ജനറൽ യൂസഫ് അൽ-ഖുദ്ദക്ക് കീഴിൽ ജനറൽ ട്രാഫിക് ഡിപ്പാർട്ട്മെന്റ് നടത്തുന്ന തുടർച്ചയായ ശ്രമങ്ങളാണ് ഈ മാറ്റത്തിന് കാരണമെന്ന് ലെഫ്റ്റനന്റ് കേണൽ ബു ഹസ്സൻ പറഞ്ഞു.

Kuwait has introduced an AI-powered camera system to monitor and enforce traffic rules, resulting in over 18,000 violations detected within two weeks.