കുവൈത്ത് സിറ്റി: ഇനിയും ബയോമെട്രിക് വിരലടയാളം രജിസ്റ്റര്‍ ചെയ്യാത്ത പ്രവാസികള്‍ക്ക് യാത്രാവിലക്ക് ഏര്‍പ്പെടുത്തി കുവൈത്ത് ആഭ്യന്തര മന്ത്രാലയം. ബയോമെട്രിക് രജിസ്‌ട്രേഷനുള്ള സമയപരിധി ഡിസംബര്‍ 31ന് അവസാനിച്ചിരുന്നു. വിരലടയാള രജിസ്‌ട്രേഷന്‍ പൂര്‍ത്തിയാക്കിയാല്‍ മാത്രമേ ഇവര്‍ക്ക് കുവൈത്തിനു പുറത്തേക്ക് യാത്ര ചെയ്യാനാകൂവെന്ന് അധികൃതര്‍ അറിയിച്ചു.
 
ഡിസംബര്‍ 31ന് മുമ്പായി ബയോമെട്രിക് രജിസ്‌ട്രേഷന്‍ നടപടികള്‍ പൂര്‍ത്തിയാക്കുന്നതില്‍ വീഴ്ച വരുത്തിയവരുടെ സര്‍ക്കാര്‍, ബാങ്കിങ് ഇടപാടുകള്‍ ജനുവരി ഒന്നു മുതല്‍ താല്‍ക്കാലികമായി മരവിപ്പിച്ചിരുന്നു. ഇതു കൂടാതെയാണ് യാത്രാ നിരോധനം ഏര്‍പ്പെടുത്തിയിരിക്കുന്നത്. ഇതു പ്രകാരം ബയോമെട്രിക് രജിസ്‌ട്രേഷന്‍ പൂര്‍ത്തിയാക്കാത്ത പ്രവാസികള്‍ക്ക് രാജ്യത്തേക്ക് പ്രവേശിക്കാനോ പുറത്തുപോകാനോ കഴിയില്ല.