കൊച്ചി: സംസ്ഥാനത്ത് സ്വര്‍ണവില വീണ്ടും ഉയര്‍ന്നു. ഗ്രാമിന് 15 രൂപയുടെ വര്‍ധനയാണ് രേഖപ്പെടുത്തിയത്. ഒരു ഗ്രാം സ്വര്‍ണത്തിന് വില 7450 രൂപയായി. പവന് വില 59,600 രൂപയായി. അതേസമയം, ആഭ്യന്തര വിപണിയില്‍ സ്വര്‍ണത്തിന്റെ ഭാവി വിലകള്‍ കുറയുകയാണെന്നാണ് സൂചന. 

മിഡില്‍ ഈസ്റ്റിലെ സംഘര്‍ഷം അയഞ്ഞത് സുരക്ഷിത നിക്ഷേപമെന്ന നിലയില്‍ സ്വര്‍ണത്തിന്റെ സാധ്യതകളെ ബാധിക്കുന്നുണ്ട്. യു.എസ് പ്രസിഡന്റായി ഡോണാള്‍ഡ് ട്രംപ് അധികാരമേല്‍ക്കുന്നത് വരും ദിവസങ്ങളില്‍ സ്വര്‍ണവിലയെ സ്വാധീനിക്കും. ട്രംപ് സര്‍ക്കാറിന്റെ നയങ്ങള്‍ എന്തെന്ന് വ്യക്തമായാല്‍ സ്വര്‍ണവിലയെ അത് സ്വാധീനിക്കുമെന്നും നിരീക്ഷകര്‍ ചൂണ്ടിക്കാട്ടുന്നു.

ട്രംപിന്റെ നയങ്ങള്‍ യു.എസില്‍ പണപ്പെരുപ്പം ഉയര്‍ത്തിയാല്‍ പലിശ നിരക്ക് കുറക്കുന്നതില്‍ കേന്ദ്രബാങ്കായ ഫെഡറല്‍ റിസര്‍വ് പുനര്‍വിചിന്തനം നടത്തുമെന്നും ഇത് ബോണ്ട് വരുമാനം ഉയര്‍ത്തുന്നതിലേക്ക് നയിക്കുമെന്നും വിദഗ്ധര്‍ പറയുന്നു. അങ്ങനെ സംഭവിച്ചാല്‍ വരും ദിവസങ്ങളില്‍ സ്വര്‍ണവില ഇടിയുന്നതിലേക്കാവും അത് നയിക്കുകയെന്നാണ് നിരീക്ഷണം.

ഇന്ത്യന്‍ ഓഹരി വിപണികള്‍ ഇന്ന് നേട്ടത്തോടെയാണ് വ്യാപാരം തുടങ്ങിയത്.