മൈസുരു:ബെംഗളുരുവിലെ മലയാളി ബിസിനസുകാരനെ മൈസുരുവിൽ പട്ടാപ്പകൽ നടുറോഡിൽ കൊള്ളയടിച്ചു. മൈസുരുവിലെ ഹാരോഹള്ളിയിലുള്ള ജയപുരയിൽ ഇന്ന് രാവിലെയാണ് സംഭവം നടന്നത്. ബെംഗളുരുവിൽ ബിസിനസ്സുകാരനായ സൂഫിയെന്ന മലയാളിക്കാണ് ദാരുണമായ കൊള്ളയടി നേരിട്ടത്. ഇയാളുടെ വണ്ടിയും ഒന്നരലക്ഷം രൂപയുമായി കൊള്ളസംഘം കടന്നുകളയുകയായിരുന്നു.

കർണാടകയിൽ പലയിടങ്ങളിലായി നടന്ന എടിഎം, ബാങ്ക് കൊള്ളകൾക്ക് പിന്നാലെയാണ് ഇത്തരമൊരു മോഷണം ഉണ്ടാവുന്നത്. വയനാട് അടക്കം ചെക്ക് പോസ്റ്റുകളിലും ഹൈവേകളിലും വണ്ടിക്കും മോഷ്ടാക്കൾക്കുമായി തെരച്ചിൽ ഊർജിതമാക്കിയിട്ടുണ്ട്. വെള്ള ഫോർഡ് എക്കോസ്‍പോർട്ട് കാറിനായി തെരച്ചിൽ തുടരുകയാണ് പൊലീസ്. വയനാട് എസ്‍പി അടക്കം അതിർത്തി ജില്ലാ പൊലീസ് മേധാവിമാരുടെ സംഘം വാഹനത്തിനായുള്ള തെരച്ചിൽ ഏകോപിപ്പിക്കുന്നുണ്ട്.