ഡൽഹി: ഡൽഹി സർവകലാശാലയിലെ വിദ്യാർഥിനിയും ത്രിപുര സ്വദേശിനിയുമായ 19-കാരി സ്നേഹ ദേബ്നാഥിന്റെ മൃതദേഹം യമുന നദിയിൽ കണ്ടെത്തി. ജൂലൈ 7-ന് കാണാതായ ആത്മറാം സനാതൻ ധർമ കോളജ് വിദ്യാർഥിനിയുടെ മൃതദേഹമാണ് ഞായറാഴ്ച വൈകിട്ട് കണ്ടെടുത്തത്. സ്നേഹ എഴുതിയതെന്ന് കരുതുന്ന ഒരു കുറിപ്പ് നേരത്തെ ലഭിച്ചിരുന്നു. തെക്കൻ ത്രിപുര ജില്ലയിലെ സബ്രൂം സ്വദേശിനിയാണ് സ്നേഹ. സംഭവം വാർത്തയായതിന് പിന്നാലെ ത്രിപുര മുഖ്യമന്ത്രി മാണിക് സാഹ പോലീസിന് ഊർജിത അന്വേഷണത്തിന് നിർദേശം നൽകിയിരുന്നു.

സ്നേഹ അവസാനമായി കുടുംബവുമായി ബന്ധപ്പെട്ടത് ജൂലൈ 7-ന് രാവിലെ 5:56-നാണ്. സുഹൃത്ത് പിറ്റൂണിയയോടൊപ്പം സരായി റോഹില്ല റെയിൽവേ സ്റ്റേഷനിലേക്ക് പോകുകയാണെന്ന് അവൾ അമ്മയെ അറിയിച്ചു. എന്നാൽ, 8:45-ഓടെ സ്നേഹയുടെ ഫോൺ സ്വിച്ച് ഓഫ് ആയി. പിറ്റൂണിയ അന്നേ ദിവസം സ്നേഹയെ കണ്ടിട്ടില്ലെന്ന് പിന്നീട് വ്യക്തമാക്കി.

ഒരു ക്യാബ് ഡ്രൈവർ സ്നേഹയെ ഡൽഹിയിലെ സിഗ്നേച്ചർ ബ്രിഡ്ജിന് സമീപം ഇറക്കിയതായി സ്ഥിരീകരിച്ചിരുന്നു. സുരക്ഷാ പ്രശ്നങ്ങൾ പതിവായതും സിസിടിവി കവറേജ് പരിമിതമായതുമായ ഈ പ്രദേശത്ത് സ്നേഹ എന്താണ് ചെയ്തതെന്ന് കണ്ടെത്തുക പോലീസിന് വെല്ലുവിളിയായിരുന്നു. ജൂലൈ 9-ന് ഡൽഹി പോലീസിന്റെ ക്രൈം ബ്രാഞ്ചും എൻഡിആർഎഫും ചേർന്ന് സിഗ്നേച്ചർ ബ്രിഡ്ജിനും 7 കിലോമീറ്റർ ചുറ്റളവിലും തെരച്ചിൽ നടത്തിയെങ്കിലും ഫലമുണ്ടായില്ല. ഒടുവിൽ, യമുന നദിയിൽ നിന്ന് മൃതദേഹം കണ്ടെത്തുകയും കുടുംബം തിരിച്ചറിയുകയും ചെയ്തു.