റിയാദ്: ഫുട്ബോളിൽ സൂപ്പർതാരം ക്രിസ്റ്റ്യാനോ റൊണാൾഡോക്ക് ഇനിയും ഒരുപാട് കാര്യങ്ങൾ ചെയ്യാൻ സാധിക്കുമെന്ന് പറഞ്ഞിരിക്കുകയാണ് മുൻ മാഞ്ചസ്റ്റർ യുണൈറ്റഡ് ഗോൾകീപ്പർ ടോമാസ് കുസ്‌സാക്ക്. റൊണാൾഡോ സ്വയം ചില ലക്ഷ്യങ്ങൾ നേടിയെടുക്കാനായി ശ്രമിക്കുന്നതിൽ സന്തോഷമുണ്ടെന്നും ടോമാസ് കുസ്‌സാക്ക് പറഞ്ഞു. ഗോളിന് നൽകിയ അഭിമുഖത്തിൽ സംസാരിക്കുകയായിരുന്നു മുൻ മാഞ്ചസ്റ്റർ യുണൈറ്റഡ് ഗോൾകീപ്പർ.  

'ഫുട്ബോളിൽ റൊണാൾഡോക്ക് എല്ലാം സാധ്യമാണ്. അദ്ദേഹം ഒരുപാട് ഗോളുകൾ നേടുന്നു. ഇനിയും ചില ലക്ഷ്യങ്ങൾ നേടാൻ അദ്ദേഹം സ്വയം നേടാൻ ശ്രമിക്കുന്നതിൽ സന്തോഷമുണ്ട്. അവനെ എനിക്കറിയാം. ഒരു ലക്ഷ്യം നേടിയാൽ അവൻ മറ്റൊരു ലക്ഷ്യം മുന്നിൽ വെക്കും. നമുക്ക് അവനെ മികച്ച താരങ്ങളിൽ ഒരാളെന്ന് വിളിക്കാം. അദ്ദേഹത്തിന് ഇപ്പോൾ 39 വയസ്സ് ഉണ്ട്. ഇത് വളരെ ബുദ്ധിമുട്ടുള്ള കാര്യമാണ്. റൊണാൾഡോ മൂന്ന് വർഷം കൂടി കളിക്കുകയാണെങ്കിൽ ഓരോ സീസണിലും അദ്ദേഹം ധാരാളം ഗോളുകൾ നേടേണ്ടി വരും,' ടോമാസ് കുസ്‌സാക്ക് പറഞ്ഞു

റൊണാൾഡോ ഇതിനോടകം തന്നെ ക്ലബ്ബിനും രാജ്യത്തിനുമായി 917 ഗോളുകളാണ് നേടിയിട്ടുള്ളത്. നിലവിൽ അൽ നസറിന്റെ താരമാണ് റൊണാൾഡോ. അൽ നസറിനായി 84 മത്സരങ്ങളിൽ ബൂട്ട് കെട്ടിയ റൊണാൾഡോ 75 ഗോളുകളും 18 അസിസ്റ്റുകളുമാണ് നേടിയിട്ടുള്ളത്. ഈ സീസണിലും റൊണാൾഡോ തകർപ്പൻ പ്രകടനങ്ങൾ തന്നെയാണ് അൽ നസറിനൊപ്പം നടത്തിക്കൊണ്ടിരിക്കുന്നത്. സീസണിൽ 19 മത്സരങ്ങളിൽ നിന്നും 17 ഗോളുകളും മൂന്ന് അസിസ്റ്റുകളുമാണ് റൊണാൾഡോ നേടിയിട്ടുള്ളത്.