ന്യൂഡല്‍ഹി: ഡല്‍ഹി കലാപത്തില്‍ ഗൂഢാലോചന കുറ്റം ചുമത്തി ജയിലിലടച്ച വിദ്യാര്‍ഥി നേതാക്കളായ ഉമര്‍ ഖാലിദിന്റെയും ഷര്‍ജീല്‍ ഇമാമിന്റെയും ജാമ്യാപേക്ഷയെ എതിര്‍ത്തുള്ള വാദം നീട്ടിക്കൊണ്ടുപോകുന്ന ഡല്‍ഹി പൊലിസിനെ ശകാരിച്ച് ഡല്‍ഹി ഹൈകോടതി. ഇത് അവസാനിപ്പിക്കണമെന്നും നിങ്ങള്‍ക്ക് അനന്തമായി സമയം അനുവദിക്കാനാകില്ലെന്നും ഇങ്ങനെ തുടരാനാകില്ലെന്നും ജസ്റ്റിസ് നവീന്‍ ചൗള, ശാലീന്ദര്‍ കൗര്‍ എന്നിവരുടെ ബെഞ്ച് ചൂണ്ടിക്കാട്ടി. ജാമ്യാപേക്ഷയാണ് കേള്‍ക്കുന്നതെന്ന ധാരണയുണ്ടാകണമെന്ന് ബെഞ്ച് ഡല്‍ഹി പൊലിസിന് മുന്നറിയിപ്പും നല്‍കി.

നേരത്തേ ജാമ്യാപേക്ഷയില്‍ ഉമര്‍ ഖാലിദിന്റെയും ഷര്‍ജീല്‍ ഇമാമിന്റെയും വാദം ഹൈകോടതി കേട്ടിരുന്നു. ഇരുവര്‍ക്കും കേസിലുള്ള പങ്കിനെക്കുറിച്ച് ചാര്‍ട്ട് നല്‍കാന്‍ കോടതി പൊലിസിനോട് നിര്‍ദേശിച്ചിരുന്നു. എന്നാല്‍ രണ്ടു ദിവസം കൂടി ഇതിനായി ആവശ്യമുണ്ടെന്ന് ഇന്ന് സ്‌പെഷല്‍ പബ്ലിക് പ്രോസിക്യൂട്ടര്‍ ആവശ്യപ്പെടുകയായിരുന്നു. ഇതോടെയാണ് വാദം അനന്തമായി നീട്ടി കൊണ്ടിപോകാനാവില്ലെന്ന് കോടതി പൊലിസിനെ അറിയിച്ചത്.

ഡല്‍ഹി കലാപത്തിലേക്ക് നയിച്ച സംഘര്‍ഷങ്ങളുമായി ബന്ധപ്പെട്ട് ഗൂഢാലോചന നടത്തി എന്നാരോപിച്ച് 2020 സെപ്റ്റംബര്‍ 13നാണ് ഉമര്‍ഖാലിദിനെ അറസ്റ്റുചെയ്തത്. മതവികാരം വ്രണപ്പെടുത്തിയെന്നും രാജ്യതലസ്ഥാനത്ത് കലാപം അഴിച്ചുവിടാന്‍ ഗൂഢാലോചന നടത്തിയെന്നുമായിരുന്നു ആരോപണം. നേരത്തേ ഡിസംബറില്‍ അടുത്ത ബന്ധുവിന്റെ വിവാഹത്തില്‍ പങ്കെടുക്കാനായി ഉമര്‍ ഖാലിദിന് വിചാരണ കോടതി ജാമ്യം അനുവദിച്ചിരുന്നു.