ഇംഗ്ലണ്ട് ഓപ്പണർ ഫിൽ സാൾട്ടിനെ പ്രശംസിച്ചുകൊണ്ട് സംസാരിക്കുകയാണ് ഇന്ത്യൻ ഇതിഹാസ സ്പിന്നർ ആർ അശ്വിൻ. സാൾട്ടിനെ ലോകത്തിലെ ഏറ്റവും വിലയേറിയ ടി-20 ബാറ്റർ എന്നാണ് അശ്വിൻ വിശേഷിപ്പിച്ചത്. തന്റെ യുട്യൂബ് ചാനലിലൂടെയാണ് അശ്വിൻ ഇക്കാര്യം പറഞ്ഞത്.

'ഫിൽ സാൾട്ട് ഐഎൽ അബുദാബി നൈറ്റ് റൈഡേഴ്‌സിനായി കളിച്ചു. ലോകത്തിലെ ഏറ്റവും വിലപിടിപ്പുള്ള ടി-20 ബാറ്റർ അവനാവുമെന്ന് നമുക്ക് പറയാം. അദ്ദേഹത്തിൻ്റെ പ്രകടനം നോക്കുകയാണെങ്കിൽ നന്നായി റൺസ് സ്കോർ ചെയ്തു. മത്സരങ്ങളിൽ അദ്ദേഹം 70 റൺസ് നേടി. എന്നാൽ ഇത്ര റൺസ് നേടുക വളരെ ബുദ്ധിമുട്ടാണ് ,' അശ്വിൻ പറഞ്ഞു. 

ടി-20യിൽ ഇംഗ്ലണ്ടിനായി 38 മത്സരങ്ങളിൽ നിന്നും 1106 റൺസാണ് സാൾട്ട് നേടിയത്. നാല് സെഞ്ച്വറികളും മൂന്ന് അർദ്ധ സെഞ്ച്വറികളും ആണ് താരം കുട്ടി ക്രിക്കറ്റിൽ നേടിയത്. 2024 ഐപിഎല്ലിൽ ചാമ്പ്യൻമാരായ കൊൽക്കത്ത നൈറ്റ് റൈഡേഴ്‌സിനായി മിന്നും പ്രകടനമായിരുന്നു ഫിൽ സാൾട്ട് നടത്തിയത്.

ഏഴ് മത്സരങ്ങളിൽ നിന്നും 350 റൺസാണ് സാൾട്ട് നേടിയത്. 58.33 ശരാശരിയിലും 185.19 സ്‌ട്രൈക്ക് റേറ്റിൽ ആയിരുന്നു താരം ബാറ്റ് വീശിയത്. 2025 ഐപിഎൽ താര ലേലത്തിൽ റോയൽ ചലഞ്ചേഴ്‌സ് ബാംഗ്ലൂർ ആണ് സാൾട്ടിനെ സ്വന്തമാക്കിയത്.