വരാനിരിക്കുന്ന ചാമ്പ്യൻസ് ട്രോഫിയിക്കുള്ള തയ്യാറെടുപ്പിലാണ് ഇന്ത്യൻ ക്രിക്കറ്റ് ടീം. ഇംഗ്ലണ്ടിനെതിരെയുള്ള ഏകദിന പരമ്പര തൂത്തുവാരിയാണ് ഇന്ത്യ ചാമ്പ്യൻസ് ട്രോഫി കളിയ്ക്കാൻ എത്തുന്നത്. ഇപ്പോൾ ഈ ടൂർണമെന്റിൽ ഇന്ത്യൻ ടീമിലെ പ്രധാനപ്പെട്ട താരമായിരിക്കുമെന്ന് പറഞ്ഞിരിക്കുകയാണ് മുൻ ഇന്ത്യൻ താരം സുരേഷ് റെയ്‌ന. കുൽദീപ് യാദവിനെകുറിച്ചാണ് റെയ്‌ന സംസാരിച്ചത്. സ്റ്റാർ സ്പോർട്സിനു നൽകിയ അഭിമുഖത്തിൽ സംസാരിക്കുകയായിരുന്നു മുൻ ഇന്ത്യൻ താരം. ഇതിന് പുറമെ ചാമ്പ്യൻസ് ട്രോഫിയിൽ കളിക്കേണ്ട ഇന്ത്യൻ പ്ലെയിങ് ഇലവനും റെയ്‌ന തെരഞ്ഞെടുത്തു.

'ചാമ്പ്യൻസ് ട്രോഫിയിൽ കുൽദീപ് യാദവ് ഇന്ത്യൻ ടീമിന്റെ വളരെ പ്രധാനപ്പെട്ട താരമായിരിക്കും. അക്ഷർ പട്ടേലും രവീന്ദ്ര ജഡേജയും മിഡിൽ ഓവറുകളിൽ മികച്ച പ്രകടനമാണ് നടത്തുന്നത്. ഈ സമയങ്ങളിൽ കുൽദീപിന് തന്റെ സ്പിൻ ബൗളിങ് കൊണ്ടുവരാൻ കഴിയും. പ്രത്യേകിച്ച് പാകിസ്താനെതിരെ അവന് തിളങ്ങാൻ കഴിയും. കൂടാതെ ന്യൂസിലാൻഡിൽ ധാരാളം ഇടംകൈയ്യൻ ബാറ്റർമാരുണ്ട്. കുൽദീപിന്റെ ബൗളിങ്ങിലൂടെ ബാറ്റർമാർ വലിയ ഷോട്ടുകൾ കളിയ്ക്കാൻ ശ്രമിക്കും. ഇത് വിക്കറ്റുകൾ ലഭിയ്ക്കാൻ കാരണമാവും,' റെയ്‌ന പറഞ്ഞു. 

ചാമ്പ്യൻസ് ട്രോഫി 2025: സുരേഷ് റെയ്‌ന നയിക്കുന്ന ഇന്ത്യൻ പ്ലെയിങ് ഇലവൻ

രോഹിത് ശർമ്മ (ക്യാപ്റ്റൻ), ശുഭ്മാൻ ഗിൽ, വിരാട് കോഹ്‌ലി, ശ്രേയസ് അയ്യർ, കെഎൽ രാഹുൽ, ഹർദിക് പാണ്ഡ്യ, അക്സർ പട്ടേൽ, രവീന്ദ്ര ജഡേജ, ഹർഷിത് റാണ, കുൽദീപ് യാദവ്, അർഷ്ദീപ് സിങ്.

ഫെബ്രുവരി 19 മുതൽ മാർച്ച് ഒമ്പത് വരെയാണ് ചാമ്പ്യൻസ് ട്രോഫി നടക്കുന്നത്. ചാമ്പ്യൻസ് ട്രോഫിയിൽ ഗ്രൂപ്പ് എയിൽ ഇന്ത്യ, ബംഗ്ലാദേശ്, പാകിസ്താൻ, ന്യൂസിലാൻഡ് എന്നീ ടീമുകളാണ് ഉള്ളത്. ഗ്രൂപ്പ് ബിയിൽ ഓസ്ട്രേലിയ, ഇംഗ്ലണ്ട്, അഫ്ഗാനിസ്ഥാൻ, ദക്ഷിണാഫ്രിക്ക എന്നീ ടീമുകളുമാണ് ഉള്ളത്.