ഡ്രൈവിങ് ലൈസൻസിനുശേഷം കേരളത്തിലെ വാഹന രജിസ്ട്രേഷൻ സർട്ടിഫിക്കറ്റുകളും (RC) ഇന്ന് മുതൽ ഡിജിറ്റലാകുന്നു. മാർച്ച് 1 ശനിയാഴ്ച മുതൽ ഡിജിറ്റൽ സർട്ടിഫിക്കറ്റുകൾ ലഭ്യമാകുമെന്ന് ഗതാഗത കമ്മീഷണർ സി.എച്ച്. നാഗരാജു അറിയിച്ചു.
ആർസി ബുക്കിന്റെ ഡിജിറ്റൽ പകർപ്പ് ഇപ്പോൾ കേന്ദ്ര സർക്കാർ മൊബൈൽ ആപ്പുകളായ ഡിജി ലോക്കർ, എം പരിവാഹൻ എന്നിവയിലും ആർ സി ‍ഡിജിറ്റൽ പകർപ്പ് ലഭിക്കും . ഇതുവഴി വാഹന ഉടമകൾക്ക് എല്ലാ പ്രായോഗിക ആവശ്യങ്ങൾക്കും സർട്ടിഫിക്കറ്റ് ഡൗൺലോഡ് ചെയ്ത് പ്രിന്റ് ചെയ്ത് ഉപയോഗിക്കാനാകും. ഡിജിറ്റൽ പകർപ്പുകൾ ബാങ്ക് ഹൈപ്പോഥിക്കേഷനുമായി ബന്ധിപ്പിക്കുന്ന പ്രക്രിയ എംവിഡി പൂർത്തിയാകുന്നതോടെ ആർസി ബുക്കുകൾ ഓൺലൈനിൽ ലഭ്യമാകും.  

കാക്കനാട്ടെ അച്ചടി കേന്ദ്രത്തിന്റെ പ്രവർത്തനം താത്കാലികമായി നിർത്തിയതും 10 കോടി രൂപയുടെ കുടിശ്ശിക ഉണ്ടായതുമാണ് കാർഡ് വിതരണം നിർത്താൻ കാരണം. അതിനാൽ അച്ചടി ചെലവ് ഒഴിവാക്കി പൂർണമായും ഡിജിറ്റൽ രീതിയിലേക്ക് മാറാൻ സർക്കാർ തീരുമാനിക്കുകയായിരുന്നു. ആർ‌ സി ഡിജിറ്റലായി മാറിയതോടെ അച്ചടി ചെലവ് മൂലം സർക്കാറിന് ലഭിക്കുന്ന സാമ്പത്തിക നേട്ടം വാഹന ഉടമയ്ക്ക് ലഭിക്കില്ല. പുതിയ സംവിധാനത്തിലേക്ക് മാറുമ്പോൾ സർക്കാരിന് നഷ്ടം ഉണ്ടാകരുതെന്ന നിലപാട് എടുത്തതിനെ തുടർന്നാണ് ഈ രീതി. 

വാഹന ഉടമകൾക്ക് എന്തൊക്കെ ചെയ്യണം?

ആധാറുമായി ബന്ധിപ്പിച്ച മൊബൈൽ നമ്പർ, ആർസി സർട്ടിഫിക്കറ്റുമായി ലിങ്ക് ചെയ്യണം. ഉടമസ്ഥാവകാശ കൈമാറ്റം, ഹൈപ്പോഥെക്കേഷൻ മാറ്റം തുടങ്ങിയ സേവനങ്ങൾക്കായി ഇത് നിർബന്ധമാണ്. ഇതിനായി ഫെബ്രുവരി മുതൽ തന്നെ വാഹന ഉടമകൾ മൊബൈൽ നമ്പർ അപ്ഡേറ്റ് ചെയ്യണമെന്ന് ഗതാഗത വകുപ്പ് നിർദ്ദേശിച്ചിട്ടുണ്ട്. ഡിജിറ്റലാകുന്നതോടെ വേ​​ഗത്തിൽ ആർ സി ലഭിക്കും

ഡിജിറ്റലാകുന്നതോടെ ആർസി ലഭിക്കുന്നതിൽ കാലതാമസം കുറയുകയും, എന്നാൽ അച്ചടി ചെലവ് ഒഴിവാകുന്നില്ലെന്നതുകൊണ്ടു ഫീസ് കുറയ്ക്കില്ല. സർവീസ് ചാർജ് വർദ്ധിപ്പിച്ചേക്കും എന്നാണു റിപ്പോർട്ട്. ഇതേ രീതിയാണ് ഡ്രൈവിങ് ലൈസൻസിനും നിലവിൽ പ്രാബല്യത്തിൽ വരുത്തിയിട്ടുള്ളത്. കേരള മോട്ടോർ വാഹന വകുപ്പിന്റെ ഡിജിറ്റൽ സേവനങ്ങളുടെ ഭാഗമായാണ് ഈ മാറ്റം. ഇനി മുതൽ ആർസി ബുക്കിന്റെ അച്ചടി പതിപ്പുകൾ വിതരണം ചെയ്യില്ല എന്ന് പൂർണ്ണമായും മോട്ടോർ വാഹന വകുപ്പ് അറിയിച്ചിട്ടുണ്ട്.