കോഴിക്കോട്: കോഴിക്കോട് മെഡിക്കൽ കോളേജ് ഐസിയു പീഡനക്കേസിലെ പ്രതിയായ അറ്റൻഡർ എഐ ശശീന്ദ്രനെ സർവീസിൽ നിന്നും പിരിച്ചുവിട്ടു. ആഭ്യന്തര അന്വേഷണത്തിൽ കുറ്റക്കാരനാണെന്ന് കണ്ടെത്തിയതിന് പിന്നാലെയാണ് മെഡിക്കൽ കോളേജ് പ്രിൻസിപ്പൽ ഈ നടപടി എടുത്തത്.

2023 മാർച്ച് 18നായിരുന്നു തൈറോയ്ഡ് ശസ്ത്രക്രിയ കഴിഞ്ഞ് മെഡിക്കൽ കോളേജ് ഐസിയുവിൽ മയക്കത്തിൽ കിടക്കുകയായിരുന്നു യുവതിയെ അറ്റൻഡർ  ശശീന്ദ്രൻ പീഡിപ്പിച്ചത്.  ഈ സംഭവത്തിന് പിന്നാലെ വലിയ പ്രതിഷേധവും നിലനിന്നിരുന്നു.  മെഡിക്കൽ കോളേജിലെ ഒരു വിഭാഗം ജീവനക്കാർ ഇയാളെ സംരക്ഷിക്കാൻ ശ്രമിക്കുന്നുവെന്ന് ചൂണ്ടിക്കാട്ടി പീഡനത്തിന് ഇരയായ യുവതി ഉൾപ്പെടെ തെരുവിൽ സമരങ്ങളും പ്രതിഷേധങ്ങളും നടത്തിയിരുന്നു. 

ആഭ്യന്തര അന്വേഷണത്തിന്റെ അടിസ്ഥാനത്തിൽ മെഡിക്കൽ കോളജിന്റെ ഭരണനിർവഹണ വിഭാഗം ശശീന്ദ്രനെ ജോലിയിൽ നിന്ന് പിരിച്ചുവിടാനുള്ള ശുപാർശ  ഉത്തരവ് പ്രിൻസിപ്പിലിന് കൈമാറുകയായിരുന്നു. ഇതിന് പിന്നാലെയാണ് പ്രിൻസിപ്പൽ ഉത്തരവ് പുറത്തിറക്കിയത്.ഉത്തരവിന്റെ പകർപ്പ് ഡിഎംഒക്ക് കൈമാറുകയും ചെയ്തിട്ടുണ്ട്. കേസിന്റെ വിചാരണ കോടതിയിൽ ആരംഭിച്ചിട്ടുണ്ട്