മുംബൈയിലെ ബാന്ദ്ര കുർള കോംപ്ലക്സിൽ ഇന്ത്യയിലെ ആദ്യ ഷോറൂം തുറന്ന് ആഴ്ചകൾക്ക് ശേഷം വിപണി വിപുലീകരിക്കാൻ ഒരുങ്ങി ടെസ്‌ല.   ഇലോൺ മസ്കിന്റെ ഉടമസ്ഥതയിലുള്ള ഇലക്ട്രിക് വാഹന നിർമാതാക്കളായ ടെസ്‌ല ഇന്ത്യയിലെ റീട്ടെയിൽ സാന്നിധ്യം വ്യാപിക്കുന്നതിനായി, ഡൽഹിയിലെ എയ്‌റോസിറ്റിയിലും ഗുഡ്ഗാവിലെ സോഹ്ന റോഡിലും പുതിയ ഷോറൂമുകൾ സ്ഥാപിക്കുന്നതിനായി വൻതോതിൽ സ്ഥലങ്ങൾ പാട്ടത്തിനെടുത്തു.

ഡൽഹി വിമാനത്താവളത്തിന് സമീപമുള്ള എയ്‌റോസിറ്റിയിലെ വേൾഡ്മാർക്ക് 3-ൽ 8,200 ചതുരശ്ര അടി വിസ്തീർണമുള്ള ഗ്രൗണ്ട് ഫ്ലോർ റീട്ടെയിൽ സ്ഥലമാണ് ടെസ്‌ല പാട്ടത്തിനെടുത്തത്. 2025 ജൂലൈ 30-ന് രജിസ്റ്റർ ചെയ്ത ഒമ്പത് വർഷത്തെ സബ്-ലീസ് കരാറിൽ 36 മാസത്തെ ലോക്ക്-ഇൻ കാലയളവിലായിരിക്കും പ്രവർത്തനം. ഓക്ക് ഇൻഫ്രാസ്ട്രക്ചർ പ്രൈവറ്റ് ലിമിറ്റഡുമായാണ് കരാർ ഉണ്ടാക്കിയിരിക്കുന്നത്. പ്രതിമാസ വാടകയായി ₹17.22 ലക്ഷം (ചതുരശ്ര അടിക്ക് ₹210), കോമൺ ഏരിയ മെയിന്റനൻസ് (CAM) ചാർജായി ചതുരശ്ര അടിക്ക് ₹33.5 എന്നിവ ടെസ്‌ല അടയ്ക്കും. 10 പാർക്കിംഗ് സ്ഥലങ്ങൾക്ക് പ്രതിമാസം ₹6,000 നിരക്കും ഈ കരാറിൽ ഉൾപ്പെടുന്നു. ₹1.03 കോടി റീഫണ്ടബിൾ സെക്യൂരിറ്റി ഡെപ്പോസിറ്റും ₹16.48 ലക്ഷം CAM ഡെപ്പോസിറ്റും മുൻകൂറായി നൽകിയിട്ടുണ്ട്. ഓരോ മൂന്ന് വർഷത്തിലും വാടക 15 ശതമാനം വർദ്ധിക്കും.

ALSO READ: ഉയർന്ന മൈലേജും യാത്രാസുഖവും: 10 ലക്ഷം രൂപയിൽ വാങ്ങാവുന്ന മികച്ച 4 സെഡാൻ കാറുകൾ 

ഈ ഷോറൂം ടെസ്‌ലയുടെ ഇലക്ട്രിക് വാഹനങ്ങളും ഊർജ ഉൽപ്പന്നങ്ങളും പ്രദർശിപ്പിക്കുന്ന ഒരു മുൻനിര റീട്ടെയിൽ ഔട്ട്‌ലെറ്റായി മാറുമെന്നാണ് കണക്ക് കൂട്ടൽ.

ഗുഡ്ഗാവിലെ സോഹ്ന റോഡിലെ ഓർക്കിഡ് ബിസിനസ് പാർക്കിലാണ് 33,475 ചതുരശ്ര അടി സ്ഥലം പാട്ടത്തിനെടുത്ത് ടെസ്‌ല രണ്ടാമത്തെ ഷോറൂം സ്ഥാപിക്കുന്നത്. ഡൽഹി-എൻസിആർ മേഖലയിലെ ആദ്യ സംയോജിത സേവന കേന്ദ്രം, ഡെലിവറി ഹബ്, റീട്ടെയിൽ ഔട്ട്‌ലെറ്റ് എന്നിവയായി ഈ സൗകര്യം പ്രവർത്തിക്കും. ജൂലൈ 28-ന് രജിസ്റ്റർ ചെയ്ത ഒമ്പത് വർഷത്തെ പാട്ടക്കരാർ, ഗർവാൾ പ്രോപ്പർട്ടീസ് പ്രൈവറ്റ് ലിമിറ്റഡ്, ഓർക്കിഡ് ഇൻഫ്രാസ്ട്രക്ചർ ഡെവലപ്പേഴ്‌സ് പ്രൈവറ്റ് ലിമിറ്റഡ്, സൺസിറ്റി റിയൽ എസ്റ്റേറ്റ് എൽഎൽപി എന്നിവയുമായാണ്. 2025 ജൂലൈ 15 മുതൽ കരാർ പ്രാബല്യത്തിൽ വന്നു.

ALSO READ: E20 ഇന്ധനം: ടൊയോട്ടയുടെ വാറണ്ടി നയം വിവാദമാകുന്നു

ജൂലൈ 15-നാണ് മുംബൈയിലെ ബികെസിയിൽ ടെസ്‌ല തങ്ങളുടെ ഇന്ത്യയിലെ ആദ്യ ഷോറൂം തുറന്നത്. പ്രതിമാസ വാടക ₹35.26 ലക്ഷമാണ്, ഇത് രാജ്യത്തെ ഏറ്റവും ഉയർന്ന വാടകകളിൽ ഒന്നാണ്. അതേ ദിവസം, ഇന്ത്യൻ വിപണിക്കായി ₹60 ലക്ഷം വിലയുള്ള ടെസ്‌ലയുടെ വൈ എന്ന മോഡൽ വിപണിയിലിറക്കിയിരുന്നു. ജൂണിൽ, മുംബൈയിലെ കുർള വെസ്റ്റിൽ 24,565 ചതുരശ്ര അടി വിസ്തീർണമുള്ള വാഹന സർവീസ് കേന്ദ്രം പ്രതിമാസം ₹37.53 ലക്ഷത്തിന് പാട്ടത്തിനെടുത്തിരുന്നു. സ്പ്രേ പെയിന്റിംഗും ബോഡി ബിൽഡിംഗും ഒഴികെയുള്ള സർവീസിംഗിനും ഗാരേജ് പ്രവർത്തനങ്ങൾക്കുമാണ് ഈ സൗകര്യം. 

ഇന്ത്യയിലെ ടെസ്‌ലയുടെ രജിസ്റ്റർ ചെയ്ത ഓഫീസ് പൂനെയിലെ പഞ്ച്ഷിൽ ബിസിനസ് പാർക്കിലാണ്. മുംബൈയിലെ ബികെസിക്ക് സമീപം ഒരു കോ-വർക്കിംഗ് ഓഫീസും പ്രവർത്തിക്കുന്നുണ്ട്.

ALSO READ: ഇസുസു വി-ക്രോസിന് 1.25 ലക്ഷം രൂപ വരെ വില കൂടും; വാഹനത്തിന് വൻ ഡിമാൻഡോ?

tesla is expanding in india, leasing 8,200 sq ft in delhi’s aerocity for a showroom and 33,475 sq ft in gurugram for a combined showroom, service center, and delivery hub, following its first indian showroom in mumbai