ഭുവനേശ്വർ: ഒഡീഷയിലെ നബരംഗ്പൂർ ജില്ലയിൽ അന്ധവിശ്വാസത്തിന്റെ പേരിൽ ഒരു മാസം പ്രായമുള്ള കുഞ്ഞിനെ 40 തവണ ഇരുമ്പുവടി ചൂടാക്കി വെച്ച സംഭവത്തിൽ പൊലീസ് അന്വേഷണം ആരംഭിച്ചു. ചികിത്സ ലഭ്യമാക്കുന്നതിനായി കുഞ്ഞിനെ സർക്കാർ ആശുപത്രിയിൽ പ്രവേശിപ്പിച്ചിരിക്കുകയാണ്.

ചന്ദഹണ്ടി ബ്ലോക്കിലെ ഗംഭരിഗുഡ ഗ്രാമപഞ്ചായത്ത് പരിധിയിലെ ഫുണ്ടൽപാഡ ഗ്രാമത്തിലാണ് സംഭവം. പനിയും മറ്റ് അസ്വാസ്ഥ്യങ്ങളുമുള്ളതിനാൽ കുഞ്ഞിനെ കുടുംബം ചികിത്സക്കായി ആശുപത്രിയിലേക്കു കൊണ്ടുപോകുന്നതിനുപകരം, ഇരുമ്പുവടി ചൂടാക്കി ഉപയോഗിച്ച് കുഞ്ഞിന്റേ ശാരീരത്തിൽ വെയ്ക്കുകയായിരുന്നു.

നബരംഗ്പൂർ ചീഫ് ഡിസ്ട്രിക്റ്റ് മെഡിക്കൽ ഓഫീസർ (CDMO) ഡോ. സന്തോഷ് കുമാർ പാണ്ഡ കുട്ടിയെ ആശുപത്രിയിൽ സന്ദർശിച്ചു. "കുഞ്ഞിന്റെ വയറ്റിലും തലയിലും 30 മുതൽ 40 വരെ ചൂടുവെച്ച മുറിവുകൾ കാണാം. അന്ധവിശ്വാസത്തിന്റെ പേരിൽ ഇത്തരം ക്രൂരമുറകൾ ഗ്രാമപ്രദേശങ്ങളിൽ ഇപ്പോഴും തുടരുകയാണെന്ന്," അദ്ദേഹം പറഞ്ഞു.

കുഞ്ഞിന് പത്ത് ദിവസം മുമ്പ് പനി ഉണ്ടായിരുന്നു. അസ്വസ്ഥത മൂലം കുറച്ചധികം കരഞ്ഞതോടെ കുഞ്ഞ് ദുഷ്ടാത്മാവിന്റെ പിടിയിലാണെന്ന് കരുതിയ കുടുംബം ചികിത്സയ്ക്കുപകരം  ഇരുമ്പുവടി ചൂടാക്കി കുഞ്ഞിനെ പോള്ളിക്കുകയായിരുന്നു .

ചൂടുവെച്ചത്തിനു പിന്നാലെ കുഞ്ഞിന്റെ ആരോഗ്യനില വഷളായതോടെ ആശുപത്രിയിൽ പ്രവേശിപ്പിക്കുകയായിരുന്നു. അതേസമയം, ഇത്തരം അന്ധവിശ്വാസങ്ങൾക്കെതിരെ ശക്തമായ ബോധവൽക്കരണ പ്രവർത്തനങ്ങൾ നടത്തുമെന്ന് ആരോഗ്യവകുപ്പ് അറിയിച്ചിട്ടുണ്ട്.സംഭവം സംബന്ധിച്ച് പൊലീസ് അന്വേഷണം ആരംഭിച്ചിരിക്കുകയാണ്.