റിയാദ്: രാസലഹരിക്കെതിരായ നടപടികള്‍ കടുപ്പിക്കാനൊരുങ്ങി സഊദി അറേബ്യ. മെത്താംഫെറ്റമിനുമായി ബന്ധപ്പെട്ട എല്ലാ ക്രിമിനല്‍ കുറ്റകൃത്യങ്ങളെയും ഗൗരവമുള്ള വലിയ കുറ്റങ്ങളുടെ പട്ടികയില്‍ ഉള്‍പ്പെടുത്തി തടവ് ശിക്ഷ ഉള്‍പ്പെടെ കടുത്ത ശിക്ഷ നല്‍കാന്‍ സഊദി അറ്റോര്‍ണി ജനറല്‍ ഷെയ്ഖ് സൗദ് അല്‍ മുജിബ് അംഗീകാരം നല്‍കി. 

മെത്താംഫെറ്റമിനുമായി ബന്ധപ്പെട്ട എല്ലാ ക്രിമിനല്‍ കുറ്റകൃത്യങ്ങളും തടവ് ഉള്‍പ്പെടെ ശിക്ഷയായി ലഭിച്ചേക്കാവുന്ന പ്രധാന കുറ്റകൃത്യങ്ങളുടെ പട്ടികയില്‍ ഉള്‍പ്പെടുത്തി. മെത്താംഫെറ്റമിന്‍ ഉപയോഗവുമായി ബന്ധപ്പെട്ട ഗുരുതരമായ ആരോഗ്യസുരക്ഷാ അപകടസാധ്യതകള്‍ കണക്കിലെടുത്തും മയക്കുമരുന്ന് ദുരുപയോഗത്തിനെതിരെ പോരാടുന്നതിനും രാസലഹരിയുടെ വ്യാപനം തടയുന്നതിനുമുള്ള രാജ്യത്തിന്റെ ശ്രമങ്ങളുടെ ഭാഗമായാണ് പുതിയ തീരുമാനം നടപ്പാക്കാന്‍ ഒരുങ്ങുന്നത്. 

ഗുരുതരമായ മാനസിക വൈകല്യങ്ങള്‍ക്കും സ്വഭാവദൂഷ്യങ്ങള്‍ക്കും കാരണമാകുന്ന ലഹരിയാണ് മെത്താംഫെറ്റമിന്‍. ഇതിന്റെ ഉപയോഗം കുറ്റകൃത്യങ്ങളുടെയും അക്രമ നിരക്കുകളുടെയും വര്‍ധനവിന് കാരണമാകുന്നതായി റിപ്പോര്‍ട്ടുണ്ട്. ഈ പ്രശ്‌നം അടിയന്തിരമായി പരിഹരിക്കുന്നതിനായാണ് സഊദി കര്‍ശനമായ നിയമ നടപടികള്‍ നടപ്പിലാക്കാന്‍ തീരുമാനിച്ചിട്ടുള്ളത്.

മെത്താംഫെറ്റമിനുമായി ബന്ധപ്പെട്ട എല്ലാ കുറ്റകൃത്യങ്ങളെയും ഗണത്തില്‍ ഉള്‍പ്പെടുത്തും. മെത്താംഫെറ്റമിന്‍ കൈവശം വയ്ക്കല്‍, കള്ളക്കടത്ത്, സൂക്ഷിക്കല്‍, വ്യക്തിഗത ഉപയോഗം എന്നിവ ഈ ഗണത്തില്‍ ഉള്‍പ്പെടും. കൂടാതെ മെത്താംഫെറ്റമിന്‍ ഉല്‍പ്പാദിപ്പിക്കാനോ നിര്‍മ്മിക്കാനോ ശ്രമിക്കുന്നതും ഈ നിയന്ത്രണത്തിന് കീഴിലെ ഒരു പ്രധാന കുറ്റകൃത്യമായി കണക്കാക്കും. ക്രിമിനല്‍ നിയമത്തിലെ ആര്‍ട്ടിക്കിള്‍ 112 അനുസരിച്ചാണ് തീരുമാനം. ആഭ്യന്തര മന്ത്രാലയം, സ്റ്റേറ്റ് സെക്യൂരിറ്റി പ്രസിഡന്‍സി എന്നിവയുടെ പരസ്പര സഹകരണത്തോടെയാകും ഇതു നടപ്പാക്കുക. തടവു ശിക്ഷ അടക്കം നല്‍കേണ്ട പ്രധാന കുറ്റകൃത്യങ്ങള്‍ നിര്‍ണ്ണയിക്കാനും അവ ഔദ്യോഗിക ഗസറ്റില്‍ പ്രസിദ്ധീകരിക്കാനും അറ്റോര്‍ണി ജനറലിന് അധികാരം ഉണ്ടാകും. 

നാര്‍ക്കോട്ടിക് ആന്‍ഡ് സൈക്കോട്രോപിക് ലഹരിവസ്തു നിയന്ത്രണ നിയമത്തിലെ ആര്‍ട്ടിക്കിള്‍ 42 പ്രകാരം മയക്കുമരുന്ന് ഉപയോഗിക്കുന്നവരെയും ലഹരിമരുന്നിന് അടിമകളായവരെയും നിയമപരമായ നടപടി നേരിടാതെ സ്വമേധയാ ചികിത്സ നേടാന്‍ അനുമതിയുണ്ടാകും. 

Saudi Arabia Cracks Down on Methamphetamine Use with Strict Punishments