വാഷിങ്ടണ്‍: ഒമ്പതു മാസത്തോളമായി ബഹിരാകാശത്ത് കുടുങ്ങിയ സുനിത വില്യംസും ബച്ച് വില്‍മോറും ഭൂമിയിലേക്കുള്ള യാത്ര തുടങ്ങി.  അവരുടെ യാത്രാപേടകം രാവിലെ പത്തരയോടെ ബഹിരാകാശ നിലയവുമായുള്ള (ഐ.എസ്.എസ്) ബന്ധം വേര്‍പെടുത്തി. ഐ.എസ്.എസുമായുള്ള ബന്ധം വേര്‍പെടുത്തുന്ന അണ്‍ഡോക്കിങ് വിജകരമായി പൂര്‍ത്തിയാക്കിയതോടെ സുനിത ഉള്‍പ്പെടെ 4 യാത്രികര്‍ കയറിയ ഡ്രാഗണ്‍ പേടകം ഭൂമിയിലേക്കു യാത്ര ആരംഭിച്ചു. 17 മണിക്കൂര്‍ നീളുന്നതാണ് മടക്കയാത്ര.  നാളെ പുലര്‍ച്ചെ 3.30ന് ഇവര്‍ ഭൂമിയില്‍ എത്തുമെന്നാണു നിഗമനം.ഫ്‌ളോറിഡ തീരത്താണ് ഇവര്‍ തിരിച്ചിറങ്ങുക. 

ഏഴു ദിവസത്തെ ദൗത്യത്തിനായാണ് ഇരുവരും അന്താരാഷ്ട്ര സ്‌പേസ് സ്റ്റേഷനിലേക്ക് തിരിച്ചത്. തുടര്‍ന്ന് ഇരുവരും അവിടെ മാസങ്ങളോളം കുടുങ്ങുകയായിരുന്നു. കഴിഞ്ഞ ദിവസമാണ് നാലു ഗഗന സഞ്ചാരികളുമായി ക്യാപ്‌സ്യൂള്‍ അന്താരാഷ്ട്ര ബഹിരാകാശ നിലയത്തില്‍ ഡോക് ചെയ്തത്.

സുനിതയും വില്‍മോറും തിരികെ വരുമ്പോള്‍ അവര്‍ക്കൊപ്പം മറ്റു രണ്ടു ഗഗന സഞ്ചാരികള്‍ കൂടിയുണ്ടാകും. ഇതിലൊരാള്‍ അമേരിക്കകാരനും മറ്റൊരാള്‍ റഷ്യക്കാരനുമാണ്. 

ഫ്‌ളോറിഡയില്‍ കഴിഞ്ഞ ദിവസം ടൊര്‍ണാഡോയും കൊടുങ്കാറ്റുമായിരുന്നു. അതിനാല്‍ കാലാവസ്ഥാ കൂടി പരിഗണിച്ചാണ് ഇവരുടെ സുരക്ഷിത ലാന്റിങ്ങിനായി സമയം തീരുമാനിച്ചത്. ഗ്രീനിച്ച് സമയം രാത്രി 9.57ന് (ഇന്ത്യന്‍ സമയം ബുധന്‍ പുലര്‍ച്ചെ 3.30) ഓടെയാണ് ലാന്റിങ്. നിലവില്‍ ബഹിരാകാശ പേടകത്തില്‍ ഇവര്‍ പുതിയ സംഘത്തിന് ചുമതലകള്‍ കൈമാറുന്ന ജോലികള്‍ പുരോഗമിക്കുകയാണെന്നും അതു കഴിഞ്ഞാല്‍ ഭൂമിയിലേക്ക് തിരിക്കുമെന്നും നാസ അറിയിച്ചു. അതേസമയം, സാഹചര്യങ്ങള്‍ക്ക് അനുസരിച്ചു സുനിതയും കൂട്ടരും ഭൂമിയില്‍ ഇറങ്ങുന്ന തീയതിയിലും സമയത്തിലും മാറ്റം വരാമെന്നും നാസ അറിയിച്ചിട്ടുണ്ട്.

സുനിതയും സംഘവും യാത്ര പറഞ്ഞ് പോരുന്നതിന്റെ വീഡിയോ നാസ പുറത്തു വിട്ടിട്ടുണ്ട്. 

LIVE: #Crew9 and their @SpaceX Dragon spacecraft are departing the @Space_Station and starting their journey back to Earth. Undocking is scheduled for 1:05am ET (0505 UTC). https://t.co/OUp4n98WeE

— NASA (@NASA) March 18, 2025